Shyǵys Qazaqstan oblysy Óskemen qalasy men Glýbokoe aýdany Stepnoe, Shmelev Log aýyldary halqynyń narazylyǵyn týǵyzǵan shoshqa fermasyna qatysty sot úkimi shyqty, dep habarlaidy QazAqparat.

ShQO Ekologiia departamenti baspasóz qyzmetiniń málimetine súiensek, turǵyndardyń shaǵymynan soń shoshqa fermasyna tekserý júrgizilgen. Sonyń nátijesinde, birqatar zańbuzýshylyq anyqtaldy.

«Atap aitqanda, «Rodnichok» sharýa qojalyǵyna tiesili shoshqa fermasy Shmelev Log jáne Leshoz aýyldarynda jumys isteýge qajetti ekologiialyq ruqsat qaǵazdaryn rásimdemegen. Shoshqa qaldyqtary ashyq jerge tastalýy saldarynan topyraq jamylǵysy lastandy. Soǵan orai departament ferma iesine aiyppul salyp, kemshilikterdi túzetýge ýaqyt berdi. Alaida odan esh nátije shyqqan joq», - delingen aqparatta.

Osydan soń is Óskemen qalalyq mamandandyrylǵan ákimshilik sotynda qaraldy. Sot shoshqa fermasyn jabý týraly sheshim shyǵardy. Úkim áli zańdy kúshine engen joq.