ShQO Bas memlekettik sanitarlyq dárigeriniń mindetin atqarýshy G. Taǵaevanyń «Shyǵys Qazaqstan oblysy turǵyndary arasynda COVID-19 infektsiiasynyń aldyn alý boiynsha shekteý sharalaryn kúsheitý týraly» jańa qaýlysy shyqty, dep habarlaidy "Ult aqparat".
Qaýlyda jazylǵandai, óńir boiynsha karantin 25 qarashaǵa deiin uzartyldy. Shekteý sharalarynyń merzimi oblys aýmaǵynda COVID-19 infektsiiasynyń taralýy boiynsha ahýaldyń ózgerýine sáikes qaita qaralýy múmkin.
«Óskemen, Semei, Ridder, Kýrchatov qalalarynyń jáne aýdandardyń perimetri boiynsha shekteý sharalarynyń qoldanylý shekaralary saqtaldy. Óskemen men Semei qalalarynda 40 ýchaskelik politsiia pýnkti qoǵamdyq tártipti baqylaidy. Turǵyndarǵa jalǵa alynǵan úiler men ǵimarattarda korporativtik, saltanatty, otbasylyq jáne basqa da buqaralyq is-sharalar ótkizýge bolmaidy. 65 jastan asqan adamdarǵa jáne halyqtyń áleýmettik qorǵalatyn toptaryna birinshi kezekte qajetti taýarlardy, azyq-túlik pen dárilik zattardy jetkizýmen ainalysatyn volonterlerdiń jumysy jalǵasady», - delingen qujatta.
Oiyn-saýyq mekemeleriniń jumys isteýine (karaoke, biliard, kompiýterlik klýbtar, túngi klýbtar, boýling ortalyqtary, jabyq úi-jailardaǵy balalardyń oiyn alańdary men attraktsiondary, kinoteatrlar, býkmekerlik keńseler, fýdkorttar) jáne oblysishilik avtobýstardyń qatynaýyna tyiym saqtalǵan. Sondai-aq aimaq shekarasyndaǵy 15 sanitarlyq posttyń jumysy ary qarai jalǵasa bermek.
«Áleýmettik qashyqtyq pen maskalyq rejimdi saqtaǵan kezde halyqtyń kóshede, saiabaqtarda, jaǵalaýlarda bir otbasy múshelerin qospaǵanda, jeke nemese 3 adamnan aspaityn toppen júrýlerine, sondai-aq ashyq aýada jeke jáne toptyq (5 adamnan aspaityn mólsherde) jattyǵý jasaýǵa ruqsat etildi. Qoǵamdyq tamaqtaný obektileri, fitnes-ortalyqtar saǵat 07.00-den 22.00-ge deiin jumys isteidi. Biraq demalys jáne mereke kúnderi jabyq bolady. Al azyq-túlik satpaityn saýda oryndarynyń, sulýlyq salondarynyń, shashtarazdardyń, monshalar men mádeniet obektileriniń jumys rejimi dúisenbiden-jumaǵa deiin saǵat 07.00-19.00 aralyǵynda jalǵasady», - dep jazylǵan jańa qaýlyda.
