Shyǵys Qazaqstan oblysynda ózin otandyq ánshilerdiń menedjeri retinde tanystyryp, kópshilikti avtokólik tigilgen utys oiynyna qatysýǵa shaqyrǵan alaiaq sottaldy, dep habarlaidy "Ult aqparat".
ShQO QAJ departamenti baspasóz qyzmetiniń málimetine súiensek, er adam 2020 jyldyń jazynda Almaty qalasynda júrgende ońai aqsha tabýǵa bel býǵan. Instagram jelisine tirkelgen ol ózin estrada ánshileriniń menedjeri retinde tanystyrady. Sodan keiin jeli paidalanýshylaryn avtokólik pen 500 myń teńge aqsha tigilgen utys oiynyna qatysýǵa shaqyrǵan.
Paraqshasyna jazylǵandar arasynan jeńimpazdardy, dálirek aitqanda jábirlenýshilerdi iriktep alyp, olarǵa kelesi mazmundaǵy habarlama jibergen: «Sálemetsiz be! Siz bizdiń utys oiynymyzdyń jeńimpazy atandyńyz! Sáttilik serik bop, baǵyńyz jandy! Endi osy ánshiniń avtorlyq albomyn satyp alýyńyz kerek, sodan keiin óz utysyńyzdy ala alasyz». Budan soń «jeńimpaz» belgili bir somany alaiaqtyń «Kaspi Gold» kartasyna aýdaryp, óziniń utysyn kútken. Alaida aqshaǵa qol jetkizgen jalǵan menedjer sol adamdy buǵattap, óz akkaýntyn óshirip tastaǵan», - delingen habarlamada.
Kóp uzamai alaiaq ustalyp, onyń isi sotqa jetti. Sot úkimimen aiyptalýshy úsh jylǵa bas bostandyǵynan shekteldi.
«Bul istegenime qatty ókinemin. Birinshi ret sottalyp otyrmyn. Endi zańdy buzbaspyn. Qylmys jasaǵan kezde onyń sońy osyndai bolady dep esh oilamadym. Qazirgi ýaqytta jábirlenýshilerge keltirilgen materialdyq shyǵyndy ótep jatyrmyn», - dedi er adam.
