Shyǵys Qazaqstan oblysynda laýazymdy tulǵalar Qytaidan Qazaqstanǵa taýarlardy kedergisiz ótkizý úshin kásipkerden júieli túrde para alyp otyrǵan. Paranyń jalpy somasy 40 myń dollar nemese 13 million teńgeden asady. Bul týraly memlekettik qyzmet isteri jáne sybailas jemqorlyqqa qarsy is-qimyl agenttiginiń resmi ókili Nurlan Jahin málimdedi, dep habarlaidy Sputnik Qazaqstan tilshisi.
Onyń aitýynsha, ShQO boiynsha sybailas jemqorlyqqa qarsy is-qimyl ulttyq biýrosy oblystyq memlekettik kirister departamenti laýazymdy tulǵalarynyń qylmystyq is-áreketiniń jolyn kesti.
"2016-2018 jyldar aralyǵynda jeke kásipker ShQO boiynsha memlekettik kirister departamenti ekonomikalyq qylmystardy tergeý qyzmetiniń asa mańyzdy isteri jónindegi aǵa ofitserine jáne Maiqapshaǵai keden beketiniń bas mamanyna Qytaidan Qazaqstanǵa taýarlardy kedergisiz ótkizý jáne qamqorlyq jasaǵany úshin júieli túrde para berip otyrǵan. Paranyń jalpy somasy 40 myń AQSh dollaryn quraidy", — dedi Jahin brifingte.
Qazirgi tańda úsh kúdikti qamaýda, atalǵan faktige qatysty tergeý júrgizilýde.
"Kúdiktilerdiń ofisterin, turǵylyqty jerlerin jáne kólikterin tintý barysynda 13 million teńgeden astam somany quraityn shetel valiýtasy tárkilendi", — dedi ol.
Sondai-aq brifing barysynda memlekettik kirister departamentiniń taǵy bir qyzmetkerine qatysty qylmystyq is qozǵalǵany belgili boldy.
"Astananyń memlekettik kirister departamenti ekonomikalyq qylmystardy tergeý qyzmeti ofitseriniń qylmysy áshkerelendi. Kúdikti 30 myń AQSh dollary mólsherinde para almaqshy bolǵan. Bul is boiynsha tergeý múddesine bailanysty aqparat jariia etilmeidi", — dedi Jahin.
