Foto ashyq derekkózden alyndy
ShQO-da jyl basynan beri prokýratýra aktileri boiynsha memleketke 690 million teńge somasyna jer ýchaskeleri qaitaryldy, - dep habarlaidy "Ult aqparat" Shyǵys Qazaqstan oblysynyń prokýratýrasyna silteme jasap.
"Jyl basynan beri ShQO prokýratýra organdary memleket menshigine quny 690 mln. teńge bolatyn 40 myń ga 119 jer ýchaskesin, onyń ishinde quny 430 mln. teńgeden asatyn, jalpy aýdany 37 myń ga paidalanylmaǵan 101 jaiylym ýchaskesin qaitardy.
Aimaqtyń aýyl sharýashylyq jáne mal sharýashylyǵy erekshelikterin eskerip, jer zańnamasynyń saqtalýyn qadaǵalaý aýmaqtyq prokýratýralardyń turaqty baqylaýynda.
Atap aitqanda, Samar aýdanynyń prokýratýrasy ShQO kásipkerler Palatasymen birlesip, jer zańnamasy normalarynyń saqtalýyna taldaý júrgizgen. Jergilikti atqarýshy organ osy jyly jeke jáne zańdy tulǵalarǵa jer ýchaskelerin ýaqytsha óteýli jer paidalaný quqyǵyn berý boiynsha 16 konkýrs ótkizbegeni anyqtaldy.
Aýdan prokýratýrasynyń qadaǵalaý aktisi boiynsha kórsetilgen buzýshylyqtar úshin ákimdiktiń jer qatynastary bóliminiń basshysy Ákimshilik quqyq buzýshylyq týraly Kodekstiń 137-babymen ákimshilik jaýapkershilikke tartyldy. Samar aýdandyq sotynyń 2023 jylǵy 27 qazandaǵy qaýlysymen oǵan 1,1 million teńge aiyppul túrinde ákimshilik jaza qoldanyldy. Qaýly zańdy kúshine engen joq, - delingen habarlamada.
Vedomstvo málimetinshe, 31 qazanda azamattar men zańdy tulǵalardyń buzylǵan quqyqtaryn qalpyna keltirý maqsatynda prokýratýranyń aralasýynan keiin aýdan ákimdigi jer paidalaný quqyǵyn berý boiynsha konkýrstyq rásimderdi ótkizý týraly habarlama joldadǵan.
"Glýbokoe aýdany prokýratýrasynyń tekserisinen soń aýdan aýmaǵynda 42 myń ga jer jaiylym retinde paidalanylmaityny anyqtaldy. Nátijesinde, Glýbokoe aýdany ákiminiń atyna qadaǵalaý aktisi engizildi. Búginde memleketke jalpy aýdany 600 gektar jáne quny 4,8 mln.teńge bolatyn 10 jer ýchaskesi qaitaryldy.
Paidalanylmaityn jerlerdi qaitarý jumystary jalǵasyp jatyr" - delingen habarlamada.
