Shyǵys Qazaqstan oblysynda Ilia Ilin atyndaǵy aýyr atletika mektebin ashý josparlanyp otyr, dep habarlaidy QazAqparat.
Bul jaily aimaq basshysy Danial Ahmetov Facebook jelisindegi jeke paraqshasynda jazdy.
«Aýyr atletikadan Olimpiada oiyndarynyń chempiony jáne ózge de jarystarda úzdikter qatarynan kóringen ziltemirshi Ilia Ilinmen kezdestim. Úsh túrli salmaq dárejesinde tórt dúrkin álem chempiony atanǵan Ilia serpe kóterýde álemdik rekordty da jańartqan. Ol jai sportshy ǵana emes, adami bolmysy men tulǵalyq qasieti ózara úndesken adam», - dedi ol.
Qazirgi tańda Ilia Ilin Qyzylorda qalasyndaǵy «Muz» saraiyn basqarady. Onyń aýyr atletika mektepterin ashý jaily úlken josparlary bar.
«Kezdesýde Shyǵys Qazaqstanda Ilia Ilin atyndaǵy mektepti ashý múmkindigin talqyladyq. Bizdiń sportshylar ártúrli álemdik jarystarda ózderin osy sport túrinde óte jaqsy kórsetedi. Óitkeni aýyr atletika - tek qana alyp dene men kúshti ǵana emes, rýhani myqtylyqty da talap etedi. Sondai-aq aýyr atletimiz Denis Ýlanovty qalpyna keltirý, ońaltý jáne úlken sportqa qaitarý týraly taqyrypta sóz qozǵadyq. Ilia jýyqta Aziia chempiony atanǵan oblysymyzdyń «Altai» klýbynyń voleibolshylaryna riza ekendigin de jetkizdi», - dedi oblys ákimi.
