Shyǵys Qazaqstan oblysy Altai aýdanynyń politsiia qyzmetkerleri esin joǵaltyp alyp adasyp ketken áieldi tapty, dep habarlaidy QazAqparat.
ShQO Politsiia departamenti baspasóz qyzmetiniń málimetine súiensek, 14 jeltoqsanda Altai aýdandyq politsiia bólimine júgingen er adam áieliniń joǵalyp ketkenin aitty. Belgili bolǵandai, 43 jastaǵy azamatsha keide este saqtaý qabiletinen aiyrylyp qalady.
Tártip saqshylary dereý izdestirý jumystaryna kirisken. Alaida áieldiń qurbylary da, týystary da onyń qaida ketkeni týraly eshteńe bilmedi. Izdestirý barysynda jedel ýákilder qaraýsyz qalǵan ǵimarattar, jertóle, bos úilerdi túgel teksergen.
«28 jeltoqsanda áiel adam Altai qalasyndaǵy kóshelerdiń birinde ornalasqan jylý trassasynyń mańynan tabyldy. Azamatshanyń aitýynsha, ol óziniń turǵylyqty mekenjaiyn, týystary men tanystarynyń úiin esine túsire almai qinalǵan. Keiin amalsyz kóshedegi jylý trassasyn pana etýge májbúr bolǵan. Qazirgi ýaqytta áiel dárigerlerdiń baqylaýynda», - delingen aqparatta.
