Shyǵys Qazaqstan oblysynda 12 jastaǵy qyzdy zorlady degen derek boiynsha sotaldy tergeý bastaldy, - dep habarlaidy Tengrinews.kz agenttigi.
12 qarashada Tarbaǵatai aýdany Tuǵyl aýylynda boldy delingen oqiǵany osy eldi mekenniń turǵyndary habarlaǵan. Olar "NeMolchiKZ" qoǵamdyq qoryna hat jazǵan. Hattan qyz ishimdikke salynǵan ákesimen birge turatyny, al anasy qaitys bolǵany anyqtaldy.
"Qyz ákesimen turady. Ákesi únemi mas, úiine neshe túrli erkekterdi alyp keledi, eshkim teksermeidi. Qamqorshylyq organdary men ákimdik habardar, biraq eshteńe istemeidi. Qyz óte aqyldy, tárbieli. Ony úsh kún buryn osy otbasyǵa kómekteskensip júretin 30 jastaǵy er adam zorlap ketken. Endi túk bolmaǵandai bostandyqta júr. Balanyń ómirin qurtty", - dep jazady aýyl turǵyndary.
Aýyl turǵyndarynyń aitýynsha, bul oqiǵany aýyl túgel biledi, onyń ishinde mektep muǵalimderi men politsiia qyzmetkerleri de bar.
"Qyzdy Almatyǵa jibergisi keledi, oqiǵa týraly eshkim eshteńe bilmegenin qalaidy, óitkeni joǵary jaqtan eshkim buǵan jaýapty bolǵysy kelmeidi. Osy habardy taratýǵa, jariialaýǵa kómektesýlerińizdi suraimyz. Pedofil óz isine jaýap bersin, óitkeni, ol bir kúni taǵy bireýdi zorlaidy", - deidi Tuǵyl aýylynyń turǵyndary.
Sondai-aq, olar zardap shekken qyzdyń ákesi qyzynyń járdemaqysyna ómir súrip jatqanyn, aýyl turǵyndarynyń kóbi otbasyna azyq-túlikpen kómektesip júretinin aitady.
Shyǵys Qazaqstan oblysynyń Politsiia departamenti aqparatqa qatysty túsinikteme berdi.
"Biyl 12 qarashada Tarbaǵatai aýdandyq politsiia bólimi sotaldy tergep-tekserýdi bastady. Qazirgi ýaqytta jedel-izdestirý sharalary júrgizilip jatyr. Qajetti sot-meditsinalyq saraptamalar taǵaiyndaldy.
Qylmystyq is júrgizý kodeksiniń 201-babynyń 1-bóligine sáikes sotqa deiingi tergep-tekserý derekteri jariia etilmeidi", - dep túsindirdi ShQO DP baspasóz qyzmeti.
