Táýelsizdik kúni merekesi qarsańynda Shyǵys Qazaqstan oblysynda «Abai álemi» kitaptar toptamasynyń tusaýkeser rásimi bolyp ótti, dep habarlaidy "Ult aqparat".
Uly Abai esimin ielengen teatr qabyrǵasynda ótken is-sharaǵa akademik Ǵarifolla Esim, Qazaqstan jazýshylar Odaǵynyń tóraǵasy Ulyqbek Esdáýlet, arheolog, t.ǵ.d. Zeinolla Samashev, jazýshy Álibek Asqarov pen Boris Sherbakovtar jáne «Abai áleminiń» redaktsiialyq top jetekshisi, belgili sátbaevtanýshy, jazýshy Medeý Sársekeev qatysty.
Qala jurtshylyǵy men qonaqtarǵa arheologiialyq qazba jumystary nátijesinde mol tarihi muramyzdy qalyptastyrǵan «Uly dalanyń altyn jádigerleri» men qazaq zergerlik óneriniń ótkeni men búgini týraly mol maǵlumat beretin «Kúmis siqyry» zergerlik óner kórmesi usynyldy.
«Art Zaman» jobasy aiasynda oblystyń kórkem sýret qoryn baiytqan Jantai Shardenov, Salihitdin Aitbaev, Maǵaýia Amandolov, Bahtiiar, Azat Tábievter jáne taǵy basqa sýretshilerdiń qolynan shyqqan týyndylar semeilikterdiń týǵan ólkeniń tumsa tabiǵaty, ótken tarihy, ulttar dostyǵy men jarqyn bolashaǵy týraly tanymyn keńeitti.
Kesh barysynda oblys ákimi Danial Ahmetov shyǵysqazaqstandyqtardy elimizdiń basty merekesi - Táýelsizdik kúnimen quttyqtady. Teatr sahnasynda «Abai álemine» engen shyǵarmalardan teatrlandyrylǵan kórinister qoiyldy.
Óńir basshysy tuǵyrly Táýelsizdigimizge qolymyz jetken kúnnen bastap, qazaq halqy óziniń biregei dástúr-saltymen, rýhani qazynalarymen qaita qaýyshqanyn aitty. Umyt bolǵan - uly esimder qaita oralǵanyn atap ótti.
«Biz «Rýhani jańǵyrý» baǵdarlamasy aiasynda Shyǵys Qazaqstannyń ádebi murasyn jas urpaq, kózi qaraqty oqyrmanǵa jetkizý úshin, arnaiy kitaptar toptamasyn shyǵarýdy qolǵa aldyq. Abai - elimizdi jeti qarańǵy túnde adastyrmaityn temir qazyq! Uly Prezidentimiz árqashan hakim sózin boitumarǵa balap jas urpaqty, buqara halyqty izgilik jolyna shaqyryp otyrady. Sol sebepti, jobanyń «Abai álemi» atanýy, Abaidan bastalýy oryndy sheshim, zańdy qubylys dep esepteimin!», - dedi ol.
Kitaptar toptamasynyń alǵashqy basylymynda uly Abai, kemeńger Shákárim, dana Muhtar, Fedor Dostoevskiidiń buryn-sońdy jariialanbaǵan shyǵarmalary jaryq kórdi. Budan basqa, jinaqqa «Amre v Parije» estelik kitaby, Tóleý Kóbdikovtyń «Atandym óz tusymda Aqyn Tóleý», Marat Qabanbaevtyń «Týǵan jerdiń tórt mezgili», Anatolii Ivanovtyń «Teni ischezaiýt v polden», Medeý Sársekeniń «Jarylys» jáne «Kómbe», Boris Sherbakovtyń «Shyǵarmalary» endi.
Barlyq kitaptar oblys kitaphanalarynyń qorlaryna, al onyń elektrondyq nusqasy qazaq ulttyq elektrondyq kitaphanasynyń saitynda ornalastyrylatyn bolady.
Kelesi jyl jastarǵa arnalǵandyqtan, ekinshi basylymdy jastar shyǵarmalarymen tolyqtyrý jóninde sheshim qabyldandy.
Osylaisha, 2019 jyly «Abai álemi» seriiasymen Shákir Ábenov, Saparǵali Begalin, Semen Anisimov, Isa Binazarov, Meńǵali Mýsin, Dmitrii Cherepanovtar syndy otyzdan astam avtordyń shyǵarmalaryn jariialaý josparlandy.
«Keleshekte biz Qazaqstan Jazýshylar Odaǵyna múshe bolǵan jerlesterimizdiń úzdik týyndylaryn shyǵarýdy jalǵastyratyn bolamyz. Bizge jas daryndardyń jinaqtaryn shyǵarýdy qolǵa alý kerek», - dedi Danial Ahmetov óz sózin qorytyndylap.
