Shyǵys Qazaqstan oblysynda 17-20 jylǵa jetetin paidaly qazbalar qory qaldy. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev Instagram-paraqshasynda jazdy, dep habarlaidy "Ult aqparat".
«Óskemende Shyǵys Qazaqstan oblysy ákimi Danial Ahmetovpen birge óńirdiń mineraldyq-shikizat bazasyn damytý boiynsha jiyn ótkizdik. Óńirden barlyq mineraldyq shikizat túri anyqtalǵan desek bolady. Altyn, kúmis, mys, tsink, qorǵasyn, titan, barit jáne jerasty sýlarynyń úlken qory Shyǵys Qazaqstanda shoǵyrlanǵan. Óńirde 17-20 jylǵa ǵana jetetin paidaly qazbalar qory qaldy. Sondyqtan geologiialyq barlaý jumysy kólemin ulǵaitýymyz qajet», - dep atap ótti ministr.
Maǵzum Myrzaǵalievtiń sózinshe, bul baǵytta zamanaýi tehnologiia ádisterin qoldaný mańyzdy. Investorlarǵa qolaily jaǵdai jasaý arqyly úlken nátijelerge qol jetkizýge bolady.
«Oblys ákimimen barlaýdy kúsheitý, qosymsha qarjy tartý máselesi boiynsha jumys tobyn qurýǵa kelistik. Onyń quramyna saladaǵy ǵalymdar, kompaniialar men múddeli memlekettik organdar ókilderi kiredi. Jastardy geologiia salasyna tartyp, baýlý da asa mańyzdy. «Qazgeologiia» kompaniiasy Shyǵys Qazaqstannyń jergilikti joǵary oqý oryndarymen áriptestikti kúsheitedi», - dep jazdy ministr.
