Foto: ashyq derekkóz
Qarjylyq monitoring agenttiginiń Shyǵys Qazaqstan oblysy boiynsha departamenti zańsyz kásipkerlik qyzmet faktisi boiynsha tergep-tekserý jumystaryn aiaqtady, dep habarlaidy Ult.kz.
Tergeý barysynda Shyǵys Qazaqstan oblysy Shemonaiha aýdanynda ornalasqan «Glinkovskoe» ken ornynda jaýapkershiligi shekteýli seriktestik basshysynyń paidaly qatty qazbalardy zańsyz óndirý men ótkizýdi uiymdastyrǵany anyqtaldy. Atalǵan kompaniianyń litsenziiasy tek geologiialyq barlaý jumystaryn júrgizýge ǵana ruqsat bergen.
Alaida, ruqsattyń bolmaýyna qaramastan, kúdiktiler temir quramdy taý jynysyn ónerkásiptik kólemde óndirý, qaita óńdeý, jinaqtaý jáne ony ishki naryqta, sondai-aq Qytai Halyq Respýblikasyna ótkizý jumystaryn júrgizgen.
Aýyr arnaiy tehnikanyń paidalanylýy qorshaǵan ortaǵa eleýli ziian keltirip, jer bederiniń tabiǵi qalpynyń buzylýyna jáne jerdiń tozýyna ákep soqqan. Zańsyz óndirilgen ónimniń jalpy kólemi 70 myń tonnadan asyp, qylmystyq tabys 1 mlrd teńgeden asqan.
Zańsyz jolmen alynǵan qarajatqa kúdiktiler biznes-ortalyq, Almaty qalasyndaǵy páter, «Land Rover Range Rover» markaly avtokólik, eki avtoturaq orny men eki jer telimin satyp alǵan. Sot sanktsiiasymen atalǵan múlikterge tyiym salyndy.
Aita keteiik, buǵan deiin departament Ulan jáne Samar aýdandarynda altyndy zańsyz óndirýmen ainalysqan eki qylmystyq toptyń qyzmetin toqtatqan bolatyn. Bul zańsyz áreketter orman alqaptarynyń joiylýyna, ózen arnalarynyń ózgerýine jáne topyraqtyń qunarly qabatynyń búlinýine sebep bolǵan.
Zańsyz ken óndirýdiń jolyn kesý óńirdiń ekologiialyq qaýipsizdigin qamtamasyz etip, tabiǵi ortanyń odan ári búlinýiniń aldyn alýǵa múmkindik berdi.
