Shyǵys Qazaqstan oblysynda paidalanylmaǵan 1 mln 32 myń gektar jer memleket menshigine qaitarylǵan, dep habarlaidy "Ult aqparat".
Óńirde aýyl sharýashylyǵy jerlerin paidalanýdyń tiimdiligin baqylaý men monitoringti kúsheitý maqsatynda birqatar jumystar atqarylýda. Bul jaily ShQO Aqparat ortalyǵynda ótken baspasóz brifingi barysynda oblystyq jerdiń paidalanylýy men qorǵalýyn baqylaý basqarmasynyń basshysy Seisenǵazy Chýkaev málimdedi.
«2015-2019 jyldar aralyǵynda paidalanylmaǵan nemese tiisti zańnamany buzý arqyly paidalanylǵan 1 mln 554 myń gektar aýyl sharýashylyǵy jerleri anyqtaldy. Onyń ishinde 1 mln 32 myń gektar memleket menshigine qaitarylǵan. 908,5 myń gektar jer aýyl sharýashylyǵy ainalymyna tartyldy. 214,2 myń gektar jerdiń ieleri qazirgi ýaqytta jerdi paidalanýǵa kirisip ketken. 307,5 myń gektarǵa qatysty materialdar áli de memlekettik organdardyń qaraýynda», - deidi ol.
Basqarma basshysynyń aitýynsha, jyl basynan beri 65 tekserý júrgizilip, sonyń nátijesinde jer zańnamasyn buzýdyń 50 faktisi anyqtalǵan. Zańbuzýshylyqqa jol bergenderge jalpy somasy 1,6 mln teńge mólsherinde aiyppul salyndy.
