Shyǵys Qazaqstan oblysy ákimi Danial Ahmetov Óskemendegi ekologiialyq jaǵdaiǵa qatysty saýalǵa jaýap berdi, - dep habarlaidy Massaget.kz.
Baspasóz máslihatynda jýrnalister jaqynda Nur-Sultanǵa Óskemen qalasynyń týmasy, stendap-komik Evgenii Chebatkov kelgenin atap ótti. Ol "Stalnoi vozdýh" atty baǵdarlamamen óner kórsetken.
"Kóbi ataýyna tańǵalyp, oilandy. Sóitsek, baǵdarlama týǵan qalasy - Óskemendegi aýanyń lastanýyna arnalǵan bolyp shyqty. Ol Óskemenge kelgen saiyn dostarynan "aýa tazardy ma" dep suraitynyn aityp, ázildedi. Olar "Iá, sál ashyldy" deidi. Halyqtyń 262 myń teńge jalaqy alatynyn eskersek, osy aýamen damalyp, densaýlyq jaǵdaiy jyldan-jylǵa nasharlaityn qala turǵyndary jalaqysyna qosymsha ekologiialyq ústemeaqy tólenýi kerek emes pe", - dep surady jýrnalist.
Suraqqa jaýap bergen Ahmetov jýrnalister "sandardy basqasha" jetkizýge tyrysatynyn aitty. Onyń aitýynsha, oblystaǵy ortasha jalaqy aýyldyq sektordy qosqanda - 262 myń teńge. Ákimniń aitýynsha, metallýrgiia salasynda, jeke kásipter arasynda jalaqy 4 million teńgege deiin bolsa, Shyǵys Qazaqstan oblysynda dárigerdiń ortasha jalaqysy 300 myń teńgeden asady, emhana dárigeriniń jalaqysy 420 myń teńgege jýyqtaǵan.
"Endi stendap-komik týraly aitsaq. Jaraidy, baryp kóre bersin. Biraq bul jerde bir jaǵymdy faktor bar - ol jaǵdaidyń sózsiz jaqsarǵanyn atap ótti. Men oǵan mynadai keńes berer edim: Máskeýde úsh jyl jumys istedim, Máskeýden 70 shaqyrym júrsin. Maǵan senińiz, Óskemen oǵan jumaq bolyp kórinedi nemese kórshi Barnaýlǵa barsyn. Maǵan senseńiz, Óskemen eýropalyq qaladai kórinedi. Alaida bul ázilkesh týraly eshteńe bilmeidi ekenmin. Bul meniń olqylyǵym shyǵar, biraq qazir mindetti túrde qaraimyn", - dedi ShQO ákimi.
