Shilde aiynyń basynan beri elimizde 1682 bala koronavirýs juqtyrǵan, dep habarlaidy QazAqparat.
Ortalyq kommýnikatsiialar qyzmetinde BAQ ókilderiniń saýalyna jaýap bere otyryp, Sanitarlyq-epidemiologiialyq baqylaý komitetiniń tóraǵasy Aijan Esmaǵambetova osyndai statistika keltirdi.
«Balalar týraly aitsaq, qańtar aiynan beri 28 267 bala koronavirýspen aýyrǵan. Onyń ishinde 54 jańa týǵan náreste bar. Shildeniń 7 kúninde 1 682 balanyń virýs juqtyrǵany tirkeldi. Iaǵni, shildeniń ǵana málimeti balalar arasynda syrqattanýdyń úlesi artqanyn aitýǵa bolady. Búginde balalar COVID-19-ben jyl basyndaǵydan jiirek, byltyrǵydan áldeqaida jiirek aýyryp jatyr. Biraq balalardyń 84 paiyzy aýrýdy jeńil, simptomsyz formada ótkerip jatqanyn aitý kerek. Al 16 paiyzy orta aýyr dárejede ótkerip jatyr», - dedi komitet basshysy.
Ainash Esmaǵambetova balalar arasynda virýs juqtyrýdyń jiileýi eresekterdiń baiaý vaktsina alyp jatqanymen tikelei bailanysty ekenin aitty.
«Shynymen de eresekter balalarǵa qajet ujymdyq immýnitet qalyptastyra almady dep aitýǵa bolady. Óitkeni ujymdyq immýnitetke qajet 60 paiyzdyq úles Qazaqstan halqynyń eresekteriniń sanymen shamalas. 18-ge tolmaǵan, vaktsina almaityn balalardyń sany shamamen – 6 mln. Iaǵni, 60 paiyzdyq ujymdyq immýnitet qalyptastyryp, balalarymyzdy qorǵaý úshin barlyq eresekter ekpe alýy kerek. Óitkeni balalar men júkti adamdarǵa ekpe alýǵa bolmaidy. Osy sanat biz úshin táýekel toby bolyp otyr. Iaǵni eresekter vaktsina alý arqyly ekpe alýǵa bolmaityn adamdardy aýrýdan qorǵaýy kerek», - dedi Sanitarlyq-epidemiologiialyq baqylaý komitetiniń basshysy.
