Prezidenttiń baspasóz hatshysy Rýslan Jeldibai sheih Halifanyń Qazaqstandy qalai qoldaǵanyn aitty, - dep habarlaidy "Ult aqparat".
"Búgin Memleket basshysy Qasym-Jomart Toqaev Abý-Dabige arnaiy ushyp baryp, Birikken Arab Ámirlikteriniń Prezidenti sheih Halifa bin Zaid Ál Nahaiannyń qaitys bolýyna bailanysty kóńil aitty.
Bul - Qazaqstannyń shynaiy dosy bolǵan sheih Halifaǵa degen Memleket basshysynyń qurmeti. Óitkeni, ol aimaqtyq jáne halyqaralyq qoǵamdastyqtaǵy elimizdiń bastamalary men iri jobalaryna árdaiym jan-jaqty qoldaý kórsetti.
Máselen, Sheih Halifa Zaid Ál Nahaian Nur-Sultan qalasyndaǵy mektep qurylysyna 13 million dollar, Shymkenttegi perinataldi ortalyqqa 25,5 million dollar, sondai-aq "Qaraǵandy-Nur-Sultan" avtojolyn qaita jóndeýge 22 million dollar grant bóldi", - dep jazdy Rýslan Jeldibai Facebook paraqshasynda.
Sondai-aq, ol koronavirýs pandemiiasynyń qiyn-qystaý kezinde Ámirlikter Qazaqstanǵa birinshi bolyp kómek qolyn sozǵanyn, atap aitqanda, 100 tonna meditsinalyq buiym men qorǵanysh zattary, arnaýly kiimder jáne basqa da qural-jabdyqtar jibergenin eske aldy.
"Sheih Halifanyń qoldaýymen Qazaqstan men Ámirlikter arasynda saýda-ekonomikalyq yntymaqtastyq qarqyndy damydy.
2005-2021 jyldar ishinde Ámirlikterden Qazaqstanǵa tartylǵan jalpy tikelei investitsiia 2,6 milliard dollardy qurady.
Búginde Qazaqstanda Ámirlikter kapitalynyń qatysýymen 276 birlesken kásiporyn jumys isteidi. Sondai-aq, elordada quny 1,6 milliard dollardy quraityn kópfýnktsionaldy "Abý Dabi Plaza" kesheniniń qurylysy júrip jatyr. Bul - asa iri ekijaqty investitsiialyq joba.
Qasym-Jomart Kemeluly aitqandai, qazaqstandyqtar sheih Halifany parasatty basshy, halyqaralyq deńgeidegi bedeldi saiasatker, kórnekti memleket qairatkeri, ekijaqty yntymaqtastyqty nyǵaitýǵa zor eńbek sińirgen tarihi tulǵa retinde árdaiym esinde saqtaidy", - dedi Prezident baspasóz hatshysy.
Aita keteiik, Birikken Arab Ámirlikterine basqa da álem liderleri kelip kóńil aityp jatyr. Máselen, Ulybritaniia premer-ministri Boris Djonson, Frantsiia prezidenti Emmanýel Makron, AQSh vitse-prezidenti Kamala Harris jáne t.b. laýazymdy tulǵalar.
Buǵan deiin Nur-Sultan kósheleriniń birine taiaýda qaitys bolǵan, BAÁ-niń burynǵy prezidenti sheih Halifa ben Zaid Ál Nahaiannyń esimi beriletini habarlanǵan.
