QR Aqparat jáne kommýnikatsiialar ministri Dáýren Abaev shettegi qazaqtarǵa Qazaqstanda shyǵatyn baspasózdi jetkizý baǵytynda jumys júrgiziletinin atap ótti, dep habarlaidy «Ult Aqparat» «QazAqparatqa» silteme jasap.
«Teleónimderimizdi tutynýshylardyń deni shet elderde turady. Biz ózge memlekette mekendeitin qandastarymyzdyń aýditoriiasyn árdaiym esten shyǵarmaýymyz kerek. Bul týraly Memleket basshysy da birneshe ret aitqan bolatyn», - deidi QR Aqparat jáne kommýnikatsiialar ministrliginiń keńeitilgen alqa májilisinde Dáýren Abaev.
Ministrdiń aitýynsha, kórshi memleketterdegi shaǵyn ǵana aýmaqty mekendep otyrǵan qazaqtardyń ózine bizdiń elde shyǵatyn baspasóz jetýi qajet.
«Memlekettik arnalar kórsetilýi tiis. Jyldyń aiaǵyna deiin osy salaǵa jaýapty vitse-ministrge memlekettik arnalarmen, baspasózben birigip tiisti máseleni sheshýdi tapsyramyn», - dedi ol.
Dáýren Abaev bul baǵytta «GalamTV» internet-telearnasyn jańartý arqyly oń qadam jasalǵanyn tilge tiek etti.
«Iaǵni, qazaqstandyq arnalardy ózimizdiń elde de, shet memlekette de joǵary sapamen kórsetý úshin qajetti tehnikalyq jumysty sátti aiaqtadyq. Sonymen qatar, bul jobany mobildi qosymsha arqyly da kórýge múmkindik bar», - dedi Dáýren Abaev.
