QR Ishki ister ministrligi 16 jasqa deiingi balalardyń ata-analarymen birge shetelge shyǵý kezinde fotosýretterin olardyń tólqujattaryna japsyrý talabyn alyp tastaý úshin elimizdiń zańnamalaryna túzetýler engizip jatyr, dep habarlaidy "Ult aqparat".
Ministrlik málimetinshe, ata-analardyń tólqujatyna balalary týraly qolmen engizilgen jazbada biometriialyq málimetter bolmaidy. Sol sebepten shekaradan ótý kezinde problemalar týyndap, kei jaǵdaida azamattar keri qaitarylyp jatady.
«Álem boiynsha qujattyq-vizalyq baqylaýdan ótkizý, jeke basty anyqtaý sharalary jetildirilýde jáne biometriialyq málimetteri bar qujattar (tsifrly fotosýretter, saýsaq tańbalary, kózdiń shatyrsha qabyǵynyń keskini jáne t.b.) engizilýde. Qazaqstandyqtar kóp baratyn elderde (AQSh, Ulybritaniia, BAÁ, Italiia, Ispaniia, Frantsiia, Chehiia, Sloveniia, Horvatiia, Gretsiia, Vengriia, Polsha, Germaniia, Shveitsariia, Shvetsiia, Qytai, Ońtústik Koreia jáne basqalary) sol memleketke ata-analarymen kelgen balalardyń tólqujaty bolýy mindetti. Al ata-ananyń tólqujatyna balalardyń fotosýretterin japsyrý qujat retinde moiyndalmaidy», - dep atap ótedi vedomstvodan.
Ata-analardyń tólqujatyna fotosýretterdi japsyrýdan bas tartý birinshi kezekte shetelde qiyn jaǵdaida tap bolýy múmkin balalardy qorǵaýǵa jáne olardy shetelge zańsyz tasymaldaý táýekelderine bailanysty bolyp otyr.
Balalarǵa tólqujat tek shetelge shyqqanda ǵana qajet. Respýblika aýmaǵynda onyń týýy týraly kýálikpen, úlken azamattar jeke kýáligimen rastalady.
«Qazir jazǵy demalys jaqyndap keledi. Osyǵan bailanysty IIM shetelge barýdy josparlaǵan ata-analarǵa basqa memlekettiń shekarasynan erkin ótý úshin ózderimen baratyn balalardyń tólqujattaryn kúni buryn rásimdeýge keńes beredi», - delingen ministrlik aqparatynda.
