QR Qarjy ministrligi Qarjy monitoringi komitetiniń Aqtóbe oblysy boiynsha Ekonomikalyq tergeý departamenti shetel azamattarynyń qarjy piramidasyn uiymdastyrý deregin anyqtady, dep habarlaidy "Ult aqparat" departamenttiń baspasóz qyzmetiniń málimetterine silteme jasap.
Baspasóz qyzmetiniń derekterine qaraǵanda, qarjy piramidasyn uiymdastyrýshylar ózderin «Unique finance» shetel kompaniiasynyń ókilderi retinde tanystyryp, turǵyndarǵa qarajattaryn «Pepsi», «Nike», «Microsoft», «Ford», «BMW» sekildi halyqaralyq iri kompaniialardyń baǵaly qaǵazdaryna investitsiialaýdy usynǵandyǵy belgili boldy.
Salymshylarǵa ai saiyn jalpy salǵan somalarynyń 6%-y kóleminde, sondai-aq, jańadan tirkelgen seriktestiń salym somasynan 5% paida alatyny ýáde etilgen. Osy kompaniiaǵa eń tómengi salym 1000 AQSh dollaryn quraǵanyn atap ótken jón.
Biraq shyndyǵynda piramida uiymdastyrýshylary salymshylarǵa «brend» kompaniialardyń jalǵan aktsiialaryn usynyp, olardyń qarjysyn ielenip otyrǵan. Olar mundai zańsyz qyzmetti Almaty, Nur-Sultan, Shymkent, Aqtóbe jáne Oral qalalarynda júrgizgen.
Qazirgi tańda atalǵan derek boiynsha QR QK 217-b. 2-b. sáikes sotqa deiingi tergeý amaldary júrgizilýde.
«Qurmetti azamattar! Aqtóbe oblysy boiynsha ETD eger «Unique finance» kompaniiasyna aqsha qarajatyn salǵan bolsańyz, resmi aryzben júginý qajettigin habarlaidy»,-delingen QR QM QMK Baspasóz qyzmeti.
