Sýret ashyq derekkózden alyndy
Ortalyq kommýnikatsiialar qyzmetinde ótken brifingte Ishki ister ministriniń orynbasary Igor Lepeha elimizge 2022 jyldyń 1 qyrkúiegine deiin ákelingen avtokólikterdi zańdastyrý qashan bastalatynyn aitty, dep habarlaidy QazAqparat agenttigi.
«Úkimet 11 qańtarda el aýmaǵyna 2022 jylǵy 1 qyrkúiekke deiin ákelingen kólik quraldarynyń jekelegen sanattaryn bastapqy tirkegeni úshin alym mólsherlemesin qoldanýdyń jáne osyndai kólik quraldaryn ákelýdi júzege asyrǵan jeke tulǵalardy óndirýshilerdiń keńeitilgen mindettemelerinen bosatýdyń qaǵidalaryn bekitti. Erejeler alǵashqy resmi jariialanǵan kúnnen keiin kúntizbelik on kún ótken soń qoldanysqa engiziledi. Iaǵni, erejelerdiń búgin jariialanǵanyn eskere otyryp, olar 2023 jyldyń 23 qańtarynda, dúisenbide kúshine enedi jáne sol kúnnen bastap biz sheteldik avtokólikterdi zańdastyrýǵa kirisemiz», - dedi Igor Lepeha.
Onyń aitýynsha, engizilgen tiisti ózgeristerge sáikes, zańdastyrylatyn kólikterdiń ieleri ýtilizatsiialyq alym tólemeidi.
«Zańdastyrý kezinde ýtilizatsiialyq alym talap etilmeidi. Kólik ieleri tek 200 000 teńge mólsherindegi bir rettik tólem jasaidy. Bul jumystar Úkimet bekitken tiisti qaǵidalar men talaptarǵa sai júrgiziledi. Birinshiden, kólik 2022 jyldyń 1 qyrkúiegine deiin elge ákelinýi kerek. Ekinshiden, ol izdeýde bolmaýy tiis. Úshinshiden, basqa memlekette burynǵy tirkelgen jeri boiynsha esepten shyǵarylýy qajet. Sońǵysy - kedendik tekserýden ótýi kerek», - dep túsindirdi Ishki ister ministriniń orynbasary.
