2022 jylǵy 1 qańtardan bastap Salyq kodeksiniń Qazaqstan aýmaǵynda ornalasqan jeke tulǵalarǵa satylǵan taýarlary, kórsetilgen qyzmetteri úshin sheteldik internet-kompaniialardyń QQS tóleý jónindegi mindettemeleri týraly normalar kúshine enedi. Bul týraly Ulttyq ekonomika ministrliginiń resmi saitynda habarlandy.
Ulttyq ekonomika ministrligi qyzmetteri men taýarlaryn onlain platformalar arqyly satatyn barlyq sheteldik kompaniialar Qazaqstan biýdjetine QQS tóleýge mindetti bolatynyn habarlaidy.
QQS mólsherlemesi satylǵan taýarlar men qyzmetter somasynyń 12%-in quraidy. Munyń qazaqstandyq salyq tóleýshilerge qatysy joq.
«Tólem tártibi óte qarapaiym. Kompaniialar salyq salý maqsatynda tirkelmeidi. Ońailatylǵan tártipte salyq organdaryna hat joldap, QQS tóleýge daiyn ekendigi týraly habarlaidy», - dedi UEM vitse-ministri Azamat Amrin.
Ákimshilendirý sheteldik internet-kompaniialar aýdarǵan somalar týraly ekinshi deńgeili bankterdiń derekteri negizinde júzege asyrylady.
Ákimshilik maqsattar úshin tólem júielerin paidalana otyryp, tólemdi jáne/nemese aqsha aýdarymyn alýshy retinde sheteldik kompaniiany sáikestendiretin belgilerdiń biregei jiyntyǵy bolyp tabylatyn Merchant ID nemese MID uǵymyn belgileý usynylady.
Merchant ID sheteldik internet-kompaniialar beretin rekvizitterdiń biri bolyp tabylady. Ol boiynsha bankter tiisti tólemder men aqsha aýdarymdaryn sáikestendiredi.
Bul – halyqaralyq praktika. Máseleni qarastyrý kezinde halyqaralyq, Eýropa elderiniń de, taiaý kórshilerimiz Resei men Belarýstiń de tájiribesi zertteldi.
UEM-niń boljamynsha, osy QQS salyǵy esebinen biýdjetke jylyna 2 mlrd teńge túsedi.
Eske salsaq, 2021 jylǵy 25 qarashada Senat Salyq kodeksine internet arqyly satylatyn taýarlarǵa tsifrlyq salyq engizýdi qarastyratyn túzetýlerdi qabyldaǵan bolatyn.
