Ońtústik Qazaqstan oblysyna arnaiy is-saparmen kelgen sheteldik BAQ ókilderi kieli jerlerdi aralap, qazaqtyń tarihymen tanysty, dep habarlaidy "Ult aqparat".
Aldymen túrki áleminiń rýhani ortalyǵyna kelgen qonaqtar ulylar mekeni sanalatyn Túrkistan shaharyn kózben kórip, Q.A. Iasaýi kesenesin aralady. AQSh, Italiia, Ulybritaniia, Egipet, Ispaniia, Japoniia, Braziliia, Ońtústik Koreia, Kanada, Avstraliia, Indoneziia, Frantsiia, Avstriia, Qytai Halyq Respýblikasy jáne Ońtústik Afrika elderinen jinalǵan jýrnalister sonymen qatar keseneniń aýmaǵyndaǵy tarihi oryndardy tamashalap, erekshe əserlerimen bólisti. Syry men tarihy tunǵan kieli orynnyń qoryq-mýzei qyzmetkeri olarǵa ekskýrsiia júrgizdi.
Álemdik BAQ ókilderiniń arasynda álemge áigili AQSh-tyń «Forbes» jáne «Frilanser», Italiianyń IA «INTERRIS», Ispaniianyń «ElCultural» jýrnaldarynyń, Ońtústik Koreianyń «JoongangIlbo» gazetiniń, Egipet «Nil-Kýltýra» jáne «OnTV» kanaldarynyń da tilshileri bar saiahatshylar keiinnen Otyrar aýdanyna saparlady.
Aýdan ákimdiginiń qyzmetkerleri olardy «Qobyz ben Dombyra» kesheni janynan kútip alyp, qurmet kórsetti. Munan soń qonaqtar «Arystanbab» kesenesine baryp ziiarat jasady. Aty álemge áigili bolǵan «Ejelgi Otyrar» qalasynyń kóne tarihy sheteldik jýrnalisterdiń qyzyǵýshylyǵyn oiatty. Kezinde Mysyrdy bilegen sultan Beibarys pen álemniń ekinshi ustazy sanalǵan Ábý Nasyr ál-Farabidiń otany kim-kimdi bolmasyn oisyz qaldyrmasy anyq.
Keseneni aralaý barysynda sheteldikter Otyrardyń tereńnen syr shertetin bai murasyna qanyqty. Álemniń 15 elinen kelgen tilshiler arnaiy jaiylǵan dastarhannan dám tatyp, qazaqtyń ulttyq taǵamdary qurt, qazy-qarta, shubat jáne taǵy da basqa aspen tanysty. Olarǵa otyrarlyq ónerpazdar uly sazger Shámshi Qaldaiaqovtyń ánderin shyrqap, kóterińki kóńil-kúi syilady.
