1 mlrd 700 mln teńgeni quraityn kontrabandalyq taýarlar memleket paidasyna tárkilendi, dep habarlaidy "Ult aqparat" Bas kólik prokýratýrasyna silteme jasap.
Sotqa deiingi tergeý organdarynyń negizgi mindetteriniń biri - qylmystyq quqyq buzýshylyqpen keltirilgen ziiandy óteý sharalaryn qabyldaý.
«Bul úshin kólik prokýrorlary qylmystyq protsestiń zańdylyǵyn qadaǵalaý barysynda urlanǵan zattar men qarajatty, sondai-aq kúdiktiniń múlkin, qylmystyq quqyq buzýshylyq jasaý qarýy jáne quraldaryn anyqtaýdy qamtamasyz etedi. Osy jumystyń nátijesinde 2019 jyly jábirlenýshilerge 1 mlrd teńgeden astam zalal ótelgen, onyń 800 mln teńgesi memleket múddesine qaitaryldy, bul 2018 jylmen salystyrǵanda 5 esege kóp» delingen habarlamada.
Sondai-aq, memleket paidasyna 1 mlrd 700 mln teńgeni quraityn kontrabandalyq taýarlar berildi.
Mysaly, 2019 jyly Bas kólik prokýratýrasynyń arnaiy prokýrorlary sotqa 11 tulǵaǵa qatysty qylmystyq isti joldady. Olar keden qyzmetkerleriniń qamqorlyǵynda bolyp, uiymdasqan qylmystyq top quramynda Birikken Arab Ámirlikterinen asa iri mólsherde «temeki jáne shinalar» kontrabandasymen ainalysqan.
Atalǵan qylmystyq is boiynsha ótken jyly 31 jeltoqsanda Mańǵystaý oblystyq qylmystyq ister jónindegi mamandandyrylǵan aýdanaralyq sotynyń aiyptaý úkimi shyqty. 1 mlrd 400 mln teńgeni quraityn kontrabandalyq taýar memleket paidasyna tárkilengen.
Aita ketý kerek, 2018 jyldyń 1 shildesinen bastap «Jábirlenýshilerge ótemaqy tóleý qory týraly» Zań normalary qoldanysqa engizildi. Bul sottarǵa jazasyn alǵandardan májbúrli tólemderdi osy qordyń paidasyna óndirip alý quqyǵyn berdi.
Búgingi kúni, kóliktegi ister boiynsha sotpen 18,3 mln. teńgeden astam tólem óndirip alyndy, onyń 11,3 mln teńgesi erikti túrde, 3,6 mln teńgesi májbúrli túrde, qalǵan 3 mln teńgesi oryndalýda.
1 shildeden bastap qordan aqshalai qarajat birjolǵy qarjylyq ótemaqy túrinde jábirlenýshilerge beriletin bolady. Tólem mólsheri - 30-dan 50-ge deiingi AEK.
Ótemaqy adam saýdasynyń nemese azaptaýdyń qurbandaryna, kámeletke tolmaǵan jynystyq zorlyq-zombylyq qurbandaryna, densaýlyqqa aýyr ziian keltirilgen adamdarǵa (onyń ishinde JQTB virýsyn juqtyrǵandar), jábirlenýshi qaitys bolǵan jaǵdaida, zańdy ókilderine (tizimde Qylmystyq kodekstiń 46-baby boiynsha 124 qylmys quramy kózdelgen) tólenetin bolady.
