Shet elderde 250 qazaq mádeni ortalyǵy jumys isteidi. «Otandastar» qory onyń 71-imen memorandým bekitti. Bul týraly «Otandastar qory» KEAQ vitse-prezidenti Maǵaýiia Sarbasov aityp berdi, dep habarlaidy QazAqparat.
«Búginde qoǵam 4 baǵytta jumys atqarady. Birinshi, shetel qazaqtarynyń ulttyq biregeiligin saqtaý maqsatynda mádeni-gýmanitarlyq jobalar uiymdastyrý. Ekinshi, elimizge kóship kelgen qandastarymyzǵa qoǵamǵa beiimdelýine járdem jasaý. Úshinshi, sheteldegi qazaqtardyń áleýmettik ahýaly men otandastarymyzben jumys jasaýdyń halyqaralyq ozyq tájiribesin zertteý. Tórtinshi, sheteldegi qazaq jastarymen bailanys ornatý, olardy Qazaqstanǵa tartý», - dep atap ótti M. Sarbasov Ortalyq kommýnikatsiialar qyzmetinde ótken baspasóz konferentsiiasynda.
Spikerdiń aitýynsha, kelesi jyly Dúniejúzi qazaqtary qaýymdastyǵynyń 30 jyldyq mereitoiy bolady. Onyń aiasynda úlken quryltai ótkizý josparlanyp otyr.
Sonymen birge, ártúrli málimetter boiynsha shet elderde 5-7 mln qazaq turady. Qazir naqty sanyn aiqyndaý úshin zertteý júrgizilip jatyr.
«2018 jyly «Otandastar» qory qurylǵan sátten bastap, sheteldegi qazaqtardy biriktiretin ulttyq mádeni ortalyqtardy túgendeý jumystaryna belsene kiristi. Ol jumysqa Syrtqy ister ministrligi men elshilikteri de úles qosty. Sonyń nátijesinde álemde 250-ge jýyq qazaq mádeni ortalyqtary bar ekeni, onyń 150-i belsendi jumys isteitini anyqtaldy. Búginde olardyń barlyǵymen bailanys ornatylyp, 71 ortalyqpen ózara yntymaqtastyq týraly Memorandýmǵa qol qoiydy», - deidi M. Sarbasov.
