Shetelde júrgen Qazaqstan azamattary endi 1414 biryńǵai bailanys ortalyǵynyń operatorymen onlain-aýdiojazba arqyly bailanysa alady. Bul týraly «Ulttyq aqparattyq tehnologiialar» AQ baspasóz qyzmetinen málim etti, dep habarlaidy "Ult aqparat".
1414 tegin qońyraý shalý úshin paidalanýshy egov.kz portalyna kirip, tómengi oń jaq buryshtaǵy «Virtýaldy keńesshi» vidjetin basý qajet. Qalqymaly terezede qulaqqap túrindegi belgige basyp, qońyraý shalý kerek. Virtýaldy keńesshi arqyly operatormen bailanys jasaý úshin mikrofon jáne qulaqqaptyń bolýy mindetti.
«Bizge basqa elderde júrgen azamattardan ótinishter jii kelip túsken edi. Osyǵan orai 1414 call-ortalyǵynyń operatorlarymen internet arqyly qosylý múmkindigin qarastyryp, búgin iske qostyq. Interneti bar adam 1414 keńesshisimen habarlasyp, bar suraqqa jaýap ala alady. Sondai-aq, keńesshimen áńgimesý barysynda kólemi 20 megabaittan aspaityn kez kelgen formattaǵy faildardy tirkeý jáne jiberý múmkindigin qarastyrdyq», - dedi «UAT» AQ Basqarma tóraǵasy Áset Turysov.
1414 bailanys ortalyǵy jumys kúnderi saǵat 9:00-den 21:00-ge deiin jáne senbi, jeksenbi kúnderi 9:00-den 14:00-ge deiin jumys isteidi. Tótenshe jaǵdai kezinde bailanys ortalyǵynyń jumysyna HQKO-nyń 2000-nan astam qyzmetkeri jumyldyryldy.
