Biyl Ulttyq biryńǵai testileý qandastar úshin 2021 jyldyń maýsym aiynda onlain formatta ótedi. Bul jaiynda Májilis depýtattarynyń saýalyna QR Bilim jáne ǵylym ministri Ashat Aimaǵambetovtiń jaýabynda aitylǵan, dep habarlaidy "Ult aqparat".
«Biyl Qazaqstandaǵy jáne álemdegi epidemiologiialyq jaǵdaiǵa bailanysty Ulttyq biryńǵai testileý qandastar úshin 2021 jylǵy maýsym aiynda 2020 jylǵy tájiribeni eskere otyryp onlain formatta ótedi. UBT tapsyrýdyń bul formaty ministrlik, Ulttyq testileý ortalyǵy jáne «Otandastar» qorymen birge jan-jaqty qaraldy. Ministrlik qandastarǵa qazaqstandyq joǵary oqý oryndarynda joǵary bilim alý múmkindigin keńeitý boiynsha turaqty negizde jumys júrgizýde. Elimizdegi jáne jalpy álemdegi epidemiologiialyq jaǵdaiǵa bailanysty UBT-ny uiymdastyrý protsesi kezinde bizdiń stýdentter men jastardyń densaýlyǵy ministrlik úshin basymdyqty másele bolyp tabylatynyn aita ketken jón», - dedi ministr.
Ashat Aimaǵambetovtiń atap ótýinshe, ótken jyly qandastar úshin UBT alǵash ret onlain formatta uiymdastyryldy. 2020 jylǵy 19 shildede ótken testileýge 551 adam qatysty.
«UBT-ny obektivti ótkizý maqsatynda test tapsyrý protsesi kezinde proktoring jáne beinemonitoring júiesi tolyq qamtamasyz etildi», - dedi ol.
