Shetelde turatyn qandastarymyzdyń arasynda joǵary bilim alýǵa arnalǵan «Otanǵa barar jol» baiqaýy jariialandy. Bul týraly Halyqaralyq bilim berý korporatsiiasynyń rektory Margarita Imandosova aitty, dep habarlaidy QazAqparat.
«Biyldan bastap Halyqaralyq bilim berý korporatsiiasy «Da Vinci Code», «American Education Challenge», «KAU Challenge», «Connecting Challenge» siiaqty respýblikalyq olimpiadalardyń nátijeleri boiynsha mektep pen kolledjderdiń eń daryndy túlekteri úshin 100-den astam ishki grant bólip otyr. Al, olimpiadanyń barlyq qatysýshylaryna arnaiy jeńildikter qarastyrylǵan. Sonymen qatar talapkerlerge UBT qorytyndy upailary boiynsha barlyq oqý kezeńine 100 paiyzǵa deiin jeńildikter beriledi», - dedi ol Ortalyq kommýnikatsiialar qyzmetinde ótken brifing barysynda.
Munan bólek Margarita Imandosova Halyqaralyq bilim berý korporatsiiasynda eki jáne odan da kóp balasy bar otbasylar, HBK bilim berý uiymdarynda oqityn bilimgerler úshin arnaiy jeńildikter, sonymen qatar HBK-da jumys isteitin qyzmetkerlerdiń balalary úshin, akademiialyq úlgerimi joǵary stýdentter úshin, kóp balaly jáne az qamtylǵan otbasylardan shyqqan bilimgerler úshin arnaiy jeńildikter qarastyrylǵanyn aitty.
«HBK-da aqyly negizde oqityn, biraq ár túrli áleýmettik jáne materialdyq jaǵdailarǵa bailanysty oqý aqysyn tóleýge múmkindigi joq daryndy magistranttar men bilimgerlerge «Scholarships» arnaiy shákirtaqysy qarastyrylǵan. Osy jyly biz «Otanǵa barar jol» baiqaýyn uiymdastyrýǵa sheshim qabyldadyq», - dedi korporatsiia rektory.
Al Halyqaralyq bilim berý korporatsiiasynyń birinshi prorektory Qaiyrjan Meńdiǵaliev aitýynsha, «Otanǵa barar jol» baiqaýy birneshe kezeńnen turady jáne onlain formatta ótkiziledi. Negizgi kezeńde, baiqaýǵa qatysýshylar Instagram áleýmettik jelisinde «Qazaq halqynyń tarihyndaǵy kórnekti tulǵalar» jáne «Men nege Halyqaralyq bilim berý korporatsiiasyna túskim keledi» taqyryptarynda beine-esseler usynady. Aqtyq synda qatysýshylar onlain-suhbattasýdan ótedi. Sonymen qatar ol Qazaqstannyń barlyq joǵary oqý oryndaryn osy bastamaǵa qosylýǵa, shetelde turatyn jáne óz týǵan elimen birigýge umtylǵan otandastarymyzdy - etnikalyq qazaqtardy qoldaýǵa shaqyrdy. «Bolashaqta, eger elimizdegi 120-dan astam JOO-nyń árqaisysy 1 ishki granttan bólse, tiisinshe 120-dan astap talapker-qandas óz otbasylarymen birge týǵan jerinde óz bolashaǵyn tabýǵa múmkindik alady», - dedi Qaiyrjan Meńdiǵaliev.
