Shetelde qazaqstandyqtardyń qylmystyq jolmen alynǵan 100 mln dollardan astam qarajaty buǵattaldy. Bul jaiynda «Kazahstanskaia pravda» gazetine suhbat bergen QR Bas prokýrory Qairat Qojamjarov atap ótken, dep habarlaidy QazAqparat tilshisi.
«Ótken jyldyń ózinde ǵana sottalǵandardy qaitarý, berý jáne quqyqtyq kómek kórsetý máseleleri boiynsha Braziliia, Mońǵoliia, Arab Ámirlikteri, Ýkraina elderimen 7 kelisimshartqa qol qoiyldy. Tolyqtai alǵanda, alys shet memlekettermen 63 ekijaqty kelisimshart jasalǵan. Atalǵan kelisimsharttardyń arqasynda 2018 jyly Qazaqstan shetel memleketterine 123 qylmyskerdi qaitaryp, shetelden 70 adamdy ekstraditsiialady», - dedi ol.
Máselen, Bas prokýrordyń dereginshe, ótken jyly adam óltirgen N.Esenamanov pen R.Najaev Qyrǵyzstannan, lańkestik qylmysqa qatysy bar E.Kúnshyǵarov Túrkiiadan, Aqtóbe oblysynda avtobýsta 52 adamnyń órtenip ketý oqiǵasyna qatysty O.Mehtiev Ózbekstannan Qazaqstanǵa jetkizildi.
Ekijaqty kelisimshart bolmasa da ótken jyly birqatar memleketten qylmyskerler elge jetkizildi. Atap aitqanda, Grekiia lańkestik qylmysqa qatysy bar D.Haisindi, Germaniia iri kólemde alaiaqtyq jasaǵan B. Ibragimov pen H.Izgiiaevty jáne psihotropty zattar kontrabandasymen ainalysqan G.Leladzeni Qazaqstanǵa qaitarǵan.
«Shetelde qylmystyq jolmen alynǵan 100 mln dollardan astam soma anyqtalyp, buǵattaldy. Bul jumystar jalǵasa beredi. Aǵymdaǵy jyly mundai kelisimshartty Ońtústik Koreia, Kýba, Grekiia jáne Makedoniiamen arada qol qoiýdy josparlap otyrmyz», - dedi Qairat Qojamjarov.
