10 elde turatyn qandastarymyz elordada bas qosty, dep habarlaidy QazAqparat tilshisi.
«Qasietti qazaq eli» atty taqyryppen ótken kezdesýge 10 elden 35 otandasymyz qatysty. Onyń ishinde Ózbekstan, Qyrǵyzstan, Túrkiia, Qytai jáne taǵy basqa elder bar.
«Bar qazaqtyń bir ǵana otany bar, ol - Qazaqstan. Bizdiń búgingi sanymyz - 16 million. Onyń 12 milliony - elimizde, qalǵan 4 milliony shetelde turady. Jalpy 44 memlekette qazaqtar bar, negizgi shoǵyry Qytai, Ózbekstan jáne Reseide oranalasqan. Elbasynyń tapsyrmasyna sáikes, biz sheteldegi otandastarymyzǵa qoldaý kórsetip qana qoimai, olarmen tyǵyz qarym-qatynas ornatýymyz kerek. Búgingi shara - sonyń dáleli», - dedi Dúniejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov.
Jiyn aiasynda «Alystaǵy aǵaiyn» derekti filminiń tusaýkeseri ótti. Onda HH ǵasyrdyń 30-50 jyldary taǵdyr taýqymetimen Túrkiiaǵa kóship barǵan Altai qazaqtarynyń taǵdyry baiandalady.
«Tarihi filmdegi oqiǵany bastan-aiaq baiandaýshy Túrkiia qazaǵy Mansur aqsaqal búginde 75 jasta. Altai kóshin onyń ákesi bastap barǵan, ol kezde aqsaqal 7 jasta bolǵan. Óziniń aitýynsha, Altai qazaqtary 9 aidyń ishinde 3 myńnan astam shaqyrymdy jaiaý baǵyndyryp, Gimalai taýyn basyp ótip, Túrkiiaǵa jetken. Filmdi kúni keshe ǵana bitirdik. Shetelde turatyn qazaqtardyń taǵdyry ártúrli. Al, myna qazaqtardyń bastan keshkeni - bólek áńgime. Tarihi týyndy arhiv materialdarymen qundy. Osy maqsatta biz Qytai, Ulybritaniia arhivterimen birlesip jumys istedik. Otandastarymyzdy qoldaýǵa baǵyttalǵan jumystar munymen bitpeidi», - dedi Z. Turysbekov.
Onyń aitýynsha, «Alystaǵy aǵaiyn» filminiń AQSh-ta turatyn qazaqtardyń taǵdyryna arnalǵan bólimi qazir daiyndyq ústinde.
Aitýly shara Dúnie júzi qazaqtary qaýymdastyǵy men «Otandastar» qorynyń uiymdastyrýymen ótip otyr.
Eske salsaq, biyl Prezidenttiń sheteldegi qazaqtardy qoldaý boiynsha berilgen tapsyrmalary negizinde Dúniejúzi qazaqtarynyń qaýymdastyǵy janynan «Otandastar» qory qurylǵan bolatyn. Qor sheteldegi jáne Qazaqstanǵa kóship kelgen etnikalyq qazaqtardy qoldaý maqsatynda quryldy.
.jpeg)