QR Syrtqy ister ministrliginde diplomatiialyq korpýs ókilderi Beibit jiyndardy uiymdastyrý men ótkizý tártibi týraly zań jobasyn talqylady, dep habarlaidy QazAqparat.
QR Aqparat jáne qoǵamdyq damý ministrliginiń jaýapty hatshysy Janat Qojahmetov zań jobasyn ázirleýde halyqaralyq tájiribe men qoǵamdyq pikirler eskerilgenin atap ótti.
«Parlament Májilisiniń jumys toptarynyń otyrysyna quqyq qorǵaý uiymdary, halyqaralyq uiymdar, úkimettik emes sektor ókilderi jáne ǵalym-sarapshylar belsendi qatysty. Qoǵamdyq talqylaý qorytyndysy boiynsha zań jobasyna Májiliste birqatar ózgeris engizildi. Qazirgi ýaqytta zań jobasy Parlament Senatynda qaralyp jatyr», - dedi Janat Qojahmetov.
J. Qojahmetov elshilerge zań jobasynyń negizgi tujyrymdary jóninde aityp berdi.
«Zańnamalyq deńgeide beibit jiyndardyń negizgi ustanymdary engizilip jatyr: zorlyqqa jol bermeý, zańdylyq, qoǵamdyq tártiptiń qaýipsizdigin qamtamasyz etý, densaýlyqty saqtaý, tulǵalardyń bostandyq quqyǵyn qorǵaý, qatysý eriktiligi jáne t.b. Májiliste talqylaýda taǵy eki ustanym - beibit jiyn ótkizý prezýmptsiiasy men jaýapkershilik. Bul ustanym jiyn qatysýshylary men uiymdastyrýshylardyń ǵana emes, memlekettik organdar men biliktiń de jaýapkershiligin bildiredi», - dedi spiker.
Onyń aitýynsha, mundai ustanymdardy engizý EQYU Demokratiialyq institýttar jáne adam quqyqtary biýrosy ázirlegen beibit jiyndar erkindigi ustanymdaryna sáikes keledi.
«Sonymen birge, zań jobasynda uǵymdyq apparat engizý qarastyrylǵan. Bul piket, narazylyq, sherý, miting syndy beibit jiyn túrleri men negizgi túsinikterdi qalyptastyrýǵa múmkindik beredi. Qoldanystaǵy zańda mundai túsinik joq jáne zań tájiribesinde de beibit jiyn qatysýshylary men uiymdastyrýshylary tarapynan narazylyq týdyratyn», - dedi Janat Qojahmetov.
Jaýapty hatshy Májiliste zańda kórsetilgen oryndardan basqa barlyq jerde ótkizýge bolatyn norma qabyldanǵanyn jetkizdi.
«Qazirgi ýaqytta Senattaǵy jumys toby aiasynda iri qalalardyń ortalyq bóligindegi arnaiy oryndar sanyn anyqtaý boiynsha norma qarastyrylyp jatyr. Eger bul norma qabyldansa, Nur-Sultandaǵy arnaiy oryndar sany eń kemi 12-ge, Almatynyń ortalyq bólikterindegi arnaiy oryndar sany - 24-ke jetedi», - dedi Janat Qojahmetov.
Otyrys barysynda Qazaqstandaǵy elshiler zań jobasy týraly óz pikirlerin bildirip, usynymdaryn aitty.
QR Syrtqy ister vitse-ministri Erjan Ashyqbaev halyqaralyq seriktester tarapynan túrli usynymdar túskenin jáne olardyń eskeriletinin atap ótti.
