Atalǵan sharaǵa Parlament depýtattary, ortalyq memlekettik organdar ókilderi jáne birneshe shet memleketten kelgen halyqaralyq sarapshylar qatysty. Quttyqtaý sózinde Parlament Senaty Tóraǵasynyń orynbasary Bektas Beknazarov bylai dedi: «Azamattardyń buzylǵan quqyqtaryn qorǵaý jáne qalpyna keltirý sot aktisin oryndaýdyń qisyndy aiaqtalýy bolyp tabylady. Protsesti utqan jáne óz quqyǵyn sot tártibimen qorǵaǵan adamdar úshin sot sheshimin oryndaýdyń sońǵy nátijesi mańyzdy. Árbir oryndalmaǵan sot sheshimi búkil sot júiesi jumysynyń tiimdiligine qatysty ádildiktiń saltanat quratyndyǵyna kúmán keltiredi. Sot bedeli onyń sheshimderiniń múltiksiz oryndalýymen qundy Al sot bedeliniń ar jaǵynda memleket bedeli tur».
Jeke sot oryndaýshylarynyń quzyretine memleket múddesi úshin iske asyrylatyn qonys aýdartý, buzý, jer ýchaskelerin alyp qoiýǵa qatysty keibir erekshelikterdi qospaǵanda, oryndaý qujattarynyń neǵurlym kóp ekendigi de erekshe ataldy. «Sonymen birge, memleket jeke sot oryndaýshylary qyzmetiniń tiimdiligin arttyrý jónindegi qajetti sharalardy jasaýda, jeke derekter týraly zańnamany buzǵany úshin jaýaptylyqty sózsiz belgilei otyryp, jeke sot oryndaýshylarynyń memlekettik organdardyń aqparattyq júiesine qol jetkizýi de osyndai maqsatty kózdeidi», dedi Bektas Ábdihanuly. Tóraǵa orynbasary bul rette jeke sot oryndaýshylary olardyń qyzmetinde kollektorlyq uiymdardyń jaǵymsyz jumys tásilderin qoldanýǵa bolmaitynyn este ustaýy tiistigin de eskerte ketti.
Qazirgi kezde elimizde 1286 jeke sot oryndaýshysy jumys isteýde. Jeke sot oryndaýshylary institýtynyń qurylǵaly bergi bes jyl ishinde aitarlyqtai kórsetkishterge qol jetkizilgen. 2016 jylǵy málimet boiynsha búgingi tańda jeke sot oryndaýshylardyń óndirisinde quny 1,9 trillion teńge bolatyn bir jarym millionnan astam atqarý qujaty bar eken. Onyń basym bóligi bank paidasyna óndirýge qatysty. Al atqarý qujatynyń 70 paiyzy memleket múddesine óndirýmen bailanysty.
Biyl Respýblikalyq jeke sot oryndaýshylary palatasynyń Halyqaralyq sot oryndaýshylarynyń odaǵyna múshelikke qabyldanyp otyrǵany belgili. Osy turǵydan otyrysta Halyqaralyq sot oryndaýshylar odaǵynyń prezidenti Fransýaza Andrie hanym sóz alyp, Uiym quramynda 88 múshe el bar ekendigin tilge tiek ete ketti.
Asqar TURAPBAIULY,
«Egemen Qazaqstan»
.jpeg)