Foto: Májilis
Memleket basshysy Qasym-Jomart Toqaevtyń «Ádiletti Qazaqstan: zań men tártip, ekonomikalyq ósim, qoǵamdyq optimizm» atty Qazaqstan halqyna Joldaýynda: «Ásker qatarynda zań men tártiptiń saqtalýy – airyqsha mańyzdy mindet», – dep aitqan bolatyn. Joldaýdyń ótkenine bir jyl taiap qaldy. Osy rette Ult.kz tilshisi Parlament Májilisiniń depýtaty, saiasattanýshy Samat Nurtazadan joldaýdyń júzege asýy týraly surap bildi.
Saiasattanýshy áskerilerge jasalyp jatqan jaǵdaidyń ózi Joldaýdyń júzege asyp jatqanyn kórsetip otyrǵanyn jetkizdi.
«Áskerilerdi baspanamen qamtý, ár balaǵa beriletin aqy degen siiaqty áleýmettik kómekter men jeńildikterden bastap, áskerdiń kiim-keshegi, qural-jabdyqtary, qarý-jaraqtaryna deiin jańaryp, jaqsy qamtylǵan. Sarbazdardyń isher tamaǵynyń da sapasy artqan. Muny biz baryp júrgen shekara aimaqtarynan da baiqaýǵa bolady. Árine sheshilmegen máseleler áli de bar, biraq serpilis baiqalady», – dedi Samat Nurtaza.
Sonymen qatar ol qorǵanys salasyna qomaqty qarajat bólinip, reforma da kerek ekenin aityp ótti.
«Mysaly Ázerbaijan biýdjet aqshasynyń qomaqty bóligin áskerge jumsap, kezinde aiyrylyp qalǵan Qarabaqty qaitaryp aldy iá? Qomaqty aqsha bólinse áskeri sala damidy. Múmkin damyǵan memleketterden, mysaly Túrkiianyń qarý-jaraqtaryn satyp alyp, bizdiń áskerlerge úiretý kerek shyǵar. Qorǵanys salasyn damytý týraly Prezident aitqan da, prezident ákimshiligi muny baqylap otyr da. Bizdiń jumys sonyń bári qalai istelip jatqanyn baryp, qadaǵalaý. Tekseremiz, qadaǵalaimyz, esep beremiz», – dedi depýtat S. Nurtaza.
Al kelesi Prezident joldaýynda qandai ózekti máselege basymdyq berilýi kerek ekenin suraǵanymyzda Samat Nurtaza halyqtyń turmysy, eldegi áleýmettik-ekonomikalyq ahýal týraly aitty.
«Birinshi kezekte – qymbatshyǵyq. Áleýmettik másele aitylýy kerek. Sebebi eń basty másele – áleýmettik másele ǵoi. Nan men súttiń baǵasy qymbattap, halyqtyń qaltasyna aýyr timeýi kerek. Qalǵany bola jatar... Aitylatyn másele kóp qoi. Halyqtyń nesiesi artyp, nesiege ómir súrip jatqan adamdardyń kóp ekeni Prezidentke aitylǵan shyǵar. Sondyqtan da sondai áleýmettik problemalarǵa aldaǵy joldaýda basymdyq beriledi dep úmittenemin óz basym», – dedi Parlament Májilisiniń depýtaty, saiasattanýshy Samat Nurtaza.
