Foto: Sherzat Polattyń isine qatysty aiyptaý aktisin oqyp turǵan prokýror
Búgin Jetisý oblysynda Sherzat Polattyń ólimine qatysty sot otyrysy ótip jatyr. Sotta memlekettik aiyptaýshy aiyptaý aktisin oqydy, dep habarlaidy KAZ.NUR.KZ.
Tóraǵalyq etýshi Januzaqov Erlan sot zalynda otyrǵandarǵa erejelerdi tanystyryp, sot zalynan áleýjelige tikelei efir júrgizýge, sottalýshylardy sýretke túsirýge tyiym salynatynyn eskertti. Memlekettik aiyptaýshy atalǵan iske qatysty qylmystyń mán-jaiyn jariia etti.
"Búgin ashyq sot otyrysynda sottalýshylar Abzal Nurǵaliuly, Zakiev Ravil Magomedovich, Belǵojaev Shyńǵys Aidosuly, Áskentai Darhan Baiylhanuly, Toqtaýbaev Nurbol Maratbekuly, Iliiasov Nurqiias Tóletbekuly, Toqtaýbaev Azamat Maratbekuly, Qaliahmet Didar Erkinuly jáne Dýman Qaidarulyna qatysty qylmystyq is qaralyp jatyr. Aldyn ala tergeý barysynda kelesi mán-jailar anyqtalyp, sottalýshylar kelesi qylmysty jasaǵan. Atap aitqanda, 3 qazan 2024 jyly túngi 23 saǵat 22 minýt shamasynda Áskentai masań kúide bola tura Almaty oblysy Talǵar aýdany Talǵar qalasy Mendeleev kóshesi 13 mekenjaiy boiynsha ornalasqan "Qamajai" dúkenine kirip, sol dúkennen úsh shólmek syra jáne 4 dana temeki alyp, óziniń tanysy, kámeletke tolmaǵan Asqarbekke Whatsapp arqyly tólmeaqy jasaý úshin habarlasyp, dúken sóresinde jazylyp turǵan Kadirova abonenttik nómirine tirkelgen Kaspi esepshotyna 1000 tg aýdarym jasaýdy ótingen", - dep oqiǵanyń qalai bolǵanyn baiandai bastady aiyptaýshy tarap.
Aiyptaýshy taraptyń sózinshe Áskentai alǵan zatynyń aqysyn tólegen boida dúkennen shyǵyp ketken.
"Arada ýaqyt óte, iaǵni 23 saǵat 33 minýtta "Qamajai" dúkeninde Nurymovtyń balasy, kámeletke tolmaǵan Bolat Sherzat kirip, dúken ishinde óz uialy telefonyn qýattaǵyshqa qoiyp, telefon qarap otyrǵan. Ary qarai 23 saǵat 47 minýtta Áskentai "Qamajai" dúkenine qaita kirip, Nurymovqa óziniń Samsung markaly uialy telefonyn qýattaǵyshqa qoiýdy ótinip, ony oǵan bergen. Nurymov uialy telefondy kassa mańyndaǵy qýattaǵyshqa qosqannan keiin Áskentai syrtqa shyǵyp dúken aldynda turǵan.
Osy jaǵdaidyń barlyǵyn kámeletke tolmaǵan Bolat dúken ishinde bola tura baiqap otyryp, kóp uzamai dúkennen syrtqa shyǵyp, syrttaǵy Áskentaidyń áreketin baqylai bastaǵan. Osy sátte Áskentai dúkenge qaita kirip qýattaǵyshta turǵan uialy telefondy alyp, syrtqa shyǵyp, dúken aldynda syra ishýin jalǵastyrǵan. 23 saǵat 52 minýtta Bolat óziniń ákesi Nurymovqa qatysty Áskentai balaǵat sózder aitty degen bolmashy sebepti paidalanyp, dúken aldynda turǵan Áskentaidyń oń jaq kózi tusynan eki ret judyryqpen soqqy jasaǵan. Bul mán jaidy dúken ishinde baqylap turǵan Nurymov, birden syrtqa shyǵyp Bolatqa eskertý jasap, dúkennen sý alyp, Áskentaidyń jaraqatynan aqqan qandy jýýǵa kómektesip, balasynyń áreketteri úshin Áskentaidan keshirim surap, densaýlyǵyna kelgen zaqymdy ótep beretinin aityp jetkizgen", - dep baiandady memlekettik aiyptaýshy.
Prokýrordyń sózine sensek, osydan keiin eki tarap ta dúkenge tólem jasalǵan-jasalmaǵanyn anyqtaýǵa tyrysqan.
"Osy ýaqytta Nurymov Áskentaidyń áreketterine ashýlanyp, keshirim surasa da, onyń janjal shyǵarǵysy kelip, basqa adamdardy shaqyryp jatqanyn kórip, dúken kassasynda turǵan ashanalyq pyshaqty alyp, syrtqa shyǵyp, Áskentaiǵa qarai oqtalǵan. Alaida kámeletke tolmaǵan Bolat ákesiniń aldynan shyǵyp, toqtatyp, ony sabyrǵa shaqyryp dúkenge qaita kirgizip jibergen. Osy ýaqytta Toqtaýbaev Nurbol óziniń baýyry Toqtaýbaev Azamat jáne tanystary Shynasylov Abzal, Sákiev Ravil, Iliiasov Nurqiias jáne Belǵojaev Shyńǵys Talǵar qalasynda ornalasqan Eiforiia kafesinde otyrǵanyn bilip, qoǵamdyq orynda toptyq tóbeles bolatynyn aldyn ala bile tura, sony qalap, Belǵojaevtyń uialy telefonyna qońyraý shalyp, olardy atalǵan dúkenge kelýin suraǵan.", - delingen aktide.
Aiyptaýshy taraptyń sózinshe atalǵan tulǵalar mas kúide bola tura aldyn ala pyshaqpen qarýlanyp, top quryp, buzaqylyq jasaý nietimen "Qamajai" dúkenine bet alǵan.
Artynsha tóbeles kezinde jalǵasyp, oǵan qatysýshylardyń biri Shynasyl Gaiypbaev pen kámeletke tolmaǵan Bolatty kórip, olarǵa Áskentaidy urǵany úshin kek saqtap, óltirýge oqtalǵany aityldy. Ol bul úshin ózimen birge ákelgen qońyr sapty pyshaqty qarý retinde qoldanǵan.
"Bolattyń kámeletke tolmaǵanyn bile tura jáne ol jerde ákesi Nurymov, anasy Bishimbieva jáne ájesi Qadyrova bolǵanyna qaramastan, olardyń kózinshe, asa qatygezdikpen Bolattyń ómirlik mańyzdy organy - júregine pyshaqpen soqqy jasaǵan", - dep oqydy memlekettik aiyptaýshy.
