Professor Sherýbai Qurmanbaiuly terminkomnyń quziretin kúsheitýdi usyndy, dep habarlaidy Sputnik Qazaqstan tilshisi.
Ǵalymnyń aitýynsha, qazir terminderdi aýdaratyn kásibi mamandar bar, biraq basym bóligi basqa salalarda eńbek etip júr. Myqty mamandardyń kúshin biriktire almaǵandyqtan, terminderdi qazaq tiline aýdarǵanda qatelikter ketip jatyr.
"Mamandardyń bárin bir ortalyqqa shoǵyrlandyryp, kúshimizdi biriktire almai otyrmyz. Terminologiia jumystary respýblikalyq deńgeide júieli túrde úilestirilip, joǵary kásibi deńgeide júrgizilmei jatyr. Osy salada jasalyp jatqan jumystar bar. Ony joqqa shyǵarmaimyz. Alaida tolyqtai júieli túrde úilestirý jumysy áli jolǵa qoiyldy dep aita almaimyz. Eń úlken másele osy", - dedi ol májiliste ótken ǵylymi-praktikalyq konferentsiiada.
Osy oraida Sherýbai Qurmanbaiuly keńes odaǵynda orys tilindegi terminderdi barlyq odaqtas memleketterdiń bári qoldanylatynyn, Máskeýde terminderdi tekseretin arnaiy komitet jumys istegenin aitty.
"Ókinishke qarai, táýelsizdigimizdi jariialaǵannan keiin biz terminologiiany dál sondai ádispen júrgizip, memlekettiń til saiasatyna negizdelgen júieli, úilestirilgen, kásibi, joǵary deńgeili qurylym jasap, bir júiemen sustai almadyq. Sol sebepti terminologiialyq jumystar shashyrap ketti deýge bolady", - dedi professor.
Sonymen qatar ǵalym terminderdi qazaq tiline saýatty aýdaratyn ortalyqtandyrylǵan júie qurý qajetigin málim etti.
"Ortalyqtandyrylǵan júie qalyptaspai otyr. Keńes odaǵy arnaiy komitetti erikkennen qurǵan joq. Ol orys tiliniń ǵylym tili retinde ústemdigin ornatý úshin quryldy. Al óz elimizdegi qazaq tiliniń ǵylym tili retinde qoldanylýy sizder men bizderdiń basty mindetimiz bolýy kerek", - dedi Sherýbai Qurmanbaiuly.
Ǵalym terminkomnyń qyzmetin kúsheitý kerek degen usynys bildirdi.
"Atalǵan qurylymnyń quziretin de, mártebesin de kótergen jón. Sonda ǵana bektiligen terminderdi keńinen qoldanady. Termintanýshy bilikti mamandardy kóbirek daiarlaý qajet", - dep túiindedi sózin professor.
