Elimizde sybailas jemqorlyqqa qarsy kúres qalai júrgizilip keldi jáne búginde agenttik paraqorlyqpen qalai kúresip jatyr? Bul týraly QR Sybailas jemqorlyqqa qarsy is-qimyl agenttiginiń tóraǵasy Marat Ahmetjanov aityp berdi, dep habarlaidy QazAqparat.
«Búginge deiin agenttik qylmystyq qýdalaý organy retinde jumys istep keldi. Bul tásilmen uzaq jumys istedik. Osyǵan deiin agenttik jumystyń tiimdiligi qylmystyń sany men shýly qamaýlarmen baǵalanyp keldi. Bul jumys ádisi sol zamannyń jemqorlyq sipityna sáikes boldy. Jumys tásilderi óte qarapaiym edi. Iaǵni, kúdiktini para alý ústinde ustaisyń, qamaisyń, sosyn tergeýdi tezirek aiaqtap, is sotqa jiberiledi. Jyl saiyn myńdaǵan jemqorlardyń ustalǵany týraly baiandaý úshin osy tásil jetkilikti edi. Qoǵam Antikordyń jumysyn osyndai kórsetkishtermen baǵalaýǵa úirenip qalǵan siiaqty», - dedi Marat Ahmetjanov óz baiandamasynda.
Sondai-aq, agenttik basshysynyń aitýynsha, paraqorlardy qamaýmen is bitpeidi.
«Biraq laýazymdy tulǵalardy ustaý, sybailas jemqorlyq problemasyna núkte qoimaitynyn túsinýimiz kerek. Iaǵni, sheneýnikterdi ustap, qamaý, jemqorlyqty júieli túrde sheshpeidi. Ustalǵan paraqordyń ornyna basqasy keledi de, eski ádiske salyp jumysty jalǵastyra beredi. Bul máselege Memleket basshysy da erekshe nazar aýdardy. Prezident «Jemqorlyqtyń negizgi sharttaryn joimai, onymen kúresý jel diirmenimen alysýmen birdei» dep baǵasyn berdi. Osy oraida bizdiń agenttik jumys tásilin ózgertip, jańashyldyqqa qadam basty. Bul baǵytta tsifrlandyrý da óz úlesin qosyp jatyr», - deidi vedomstvo basshysy.
