Tótenshe jaǵdai ýaqytynda memlekettik satyp alý boiynsha taýar quny shamamen 43 paiyzǵa ósken. Bul týraly «Atameken» ulttyq kásipkerler palatasynyń basqarma tóraǵasynyń orynasary Erbol Óstemirov málim etti, dep habarlaidy QazAqparat.
«Tótenshe jaǵdai rejiminde memlekettik satyp alýdyń jańa tártibi engizildi. Tyń ózgeristerge sáikes merzim qysqaryp, áleýetti tasymaldaýshylarǵa da qoiylatyn talaptar ózgerdi. Bir jaǵynan bul durys. Sebebi memlekettik organdarǵa TJ rejimi ýaqytynda taýarlar men qyzmetterdi tezirek satyp alýǵa múmkindik beredi. Ekinshi jaǵynan merzimniń bulaisha qysqarýy jemqorlyq faktilerin týyndatady», - dedi Erbol Óstemirov agenttiktiń Facebook paraqshasynda bergen suhbatynda.
Onyń aitýynsha, tótenshe jaǵdai ýaqytynda memlekettik satyp alý boiynsha taýarlardyń quny birden sharyqtap ketken.
«Bizdiń júie kórsetip otyrǵandai, tótenshe jaǵdai ýaqytynda taýardyń baǵasy 43 paiyzǵa ósken. Iaǵni memlekettik organdardyń óz paidasyn oilaǵan laýazymdy qyzmetkerleri jemqorlyq áreketin jasap, osynaý erekshe tártipti paidasyna jaratady», - dep atap ótti Erbol Óstemirov.
