«Nur Otan» partiiasy óziniń aqparattyq strategiiasyn qaita qaraýy kerek. Partiianyń Saiasi keńesiniń keńeitilgen otyrysynda QR Tuńǵysh Prezidenti Nursultan Nazarbaev osyndai másele kóterdi, dep habarlaidy QazAqparat.
«Partiia alǵa qarai jyljityn, aqparattyq, ideologiialyq saiasatty júrgizýi tiis. Búgingi tańda mediada shynaiy beineni buldyratatyn arnalar kóbeiip barady. Jai ǵana qaidaǵy bir suraqty laqtyrady da – shyndyqqa sai kele me, joq pa bilip alyńdar deidi (...) Keiin partiianyń tolyq mediatoby, televiziialyq arnasy, gazetteri – aýzyn jaýyp otyrady. Bizdiń ortalyq aqparattyq arnalar da aýzyn ashpaidy. Oi, qorqamyz... Buryn men kerisinshe, maǵan aqsha tóle, áitpese sen týraly jaman jazamyn degen redaktorlardy jazalaityn edim. Ákimder osy úshin aqsha tóleitin. Al qazir eger sen birdeńe jazsań, bireý arqyly seni jumystan shyǵaramyn degen bopsa paida boldy. Biz ony bilemiz. Eger osyndai jaǵdai tirkelse, qandai laýazymda bolsa da, jumystan shyǵaramyz. Kim bolsa, ol bolsyn», - dedi Elbasy «Nur Otan» partiiasy Saiasi keńesiniń keńeitilgen otyrysynda.
Nursultan Nazarbaev qazirgi tańda kez kelgen máseleni respýblikalyq deńgeidegi problema etip kórsetý jaǵdaiy beleń alyp bara jatqanyn aityp ótti.
«Internet oǵan kómektesip jatyr. Eshkim jaýap bermeidi. Partiia jala japqany úshin jaýapkershilikti kúsheitý maqsatynda zań qabyldaý bastamasyn kóterýi tiis. Eshkim eshkimge isti absýrdqa deiin jetkizý quqyǵyn bergen joq. Dástúrli BAQ pozitsiiasynan aiyrylyp barady. Dáýren Abaev osy másele boiynsha oilanyp, jumys júrgizýi kerek. Telefondyq quqyq bolmaýy tiis. Sheneýnikter redaktorlarǵa qysym kórsetedi. Ártúrli joldarmen syni materialdardyń jolyn kesedi. Osydan keiin qoǵamdyq sanada balama shynaiylyq qalyptasady. «Nur Otan» sol sebepti, óziniń aqparattyq strategiiasyn qaita qaraýy kerek. Partiialyq BAQ shynaiy ári jedel aqparattyń kózine ainalyp, oza jumys júrgizýi tiis. Eń daryndy adamdardy tartyp, tiisti ailyq tólenýi kerek», - dedi Elbasy.
