Sheneýnikter aýyl turǵyndarynyń sany azaia bastasa, bilim oshaqtary men densaýlyq saqtaý mekemelerin jaba salýdy ádetke ainaldyrdy.
Bul týraly «Aýyl» halyqtyq-demokratiialyq patriottyq partiiasynyń kezekten tys XVIII sezinde partiia tóraǵasy Áli Bektaev aitty, dep habarlaidy QazAqparat.
«Aýyl – ulttyq qundylyqtarymyzdyń altyn besigi, bereke men bailyǵymyzdyń bastaýy. Aýylda ósken árbir azamat týǵan topyraǵyn barynsha qadirlep-qasterleýge mindetti. Tórt túligin túletip, sharýasyn órge súirep otyrǵan aýyl – bútin bir eldiń asyraýshysy, qainaǵan eńbektiń qainar kózi. Alaida, ókinishke orai, búgin aýyl adamynyń turmysy jaily dep aita almaimyz. «Arqa jaily bolsa, arqar aýyp nesi bar» demekshi, qarqyny ósip kele jatqan ýrbanizatsiia úderisi - sonyń aiqyn dáleli», - dedi ol.
Onyń atap ótýinshe, memleket tarapynan «Aýyl – el besigi» atty arnaiy joba sońǵy eki jyldyń kóleminde iske asyrylýda. Alaida ol baǵdarlamanyń óziniń aýyl infraqurylymyn retteýge qaýqary jetkiliksiz. Memlekettik organdar arasynda úilesimdi tirlik joq, bólingen qarajattyń tiimdiligi tómen.
«Biz tehnologiia qaryshtap damyǵan dáýirdemiz. Dese de, elimizde aýyz sý máselesi áli sheshimin tapqan joq. XXI ǵasyrda ómir súrip jatsaq ta, áli aýyl ishin esek arbamen kezip, bóshkelep, qutymen sý tasyp júrmiz. Aýyl balasynyń qaqaǵan qys pen aptap jazdaǵy túske deiingi ýaqyty sý tasýmen ótedi.
Jol sapasy tipti syn kótermeidi. Shalǵaidaǵy eldi mekenderdi aitpaǵannyń ózinde astana men oblys ortalyqtarynyń mańyndaǵy aýyldarǵa jetý qiyn. Aýyl ishindegi joldardyń jaǵdaiy máz emes», - dedi partiia tóraǵasy.
Áli Bektaevtyń aitýynsha, Ulttyq ekonomika ministrligi aýyldyq jerlerdiń qajettiligin naqtylaý úshin arnaiy saraptama júrgizgen. Onyń qorytyndysy boiynsha ár besinshi aýyldaǵy mektep pen balabaqsha, ár úshinshi aýyldaǵy meditsina mekemesi kúrdeli jóndeýdi qajet etip tur.
«Sheneýnikter aýyl turǵyndarynyń sany azaia bastasa, bilim oshaqtary men densaýlyq saqtaý mekemelerin jaba salýdy ádetke ainaldyrdy. Ákimder ámbebap oqytýshy men feldsherdi shaqyryp, tyǵyryqtan shyǵýdyń ornyna eldi mekendi «bolashaǵy joq» dep ataýǵa beiim. Balasyna bilim, ózine alǵashqy meditsinalyq kómek ala almaǵan adam aýylda tura ma? Osyndai qarapaiym ómir aksiomasyn túsine almaǵan basshylar kóp. Byltyr aýyldan qalaǵa jarty millionǵa jýyq adam qonys aýdarǵan. 2014 jyldan bastap bala týý kórsetkishi boiynsha kósh basynda aýyl emes qala tur. Buny qalai túsinýge bolady? Osynyń barlyǵyn eskere otyryp, «Aýyl» partiiasy óziniń sailaýaldy baǵdarlamasyna aýyldyq eldi mekenderdiń infraqurylymyn damytý jónindegi memlekettik joba daiyndaý qajettigin usynyp otyr. Aýylda ómir súrý deńgeii qalaǵa jetpese de jete ǵabyl bolýy shart dep esepteimiz. Biz Parlamentke ótsek te, ótpesek te osy baǵytty qatań baqylaýǵa alyp, únemi kóterip otyratyn bolamyz», - dedi «Aýyl» partiiasynyń jetekshisi.
