Aqtóbedegi Krivoe ozero massiviniń sý tasqynynan zardap shekken turǵyndary "Diapazon" basylymyna tótenshe oqiǵadan keiingi jaǵdailaryna shaǵymdandy.
"Meniń úiimdi sý basty. Sý tasqynynan keiin eki balammen birge aýrýhanada jattym. Endi bizdi aýrýhanadan shyǵardy, baratyn jerim joq. Munda (sý astynda qalǵan úiine) qaityp kelgim kelmeidi, sý belimizge deiin jetip tur. Onda qalai turamyn?", - dedi jergilikti turǵyn Jansaia Amanjolova.
Áiel turǵyn úidiń úige keltirilgen zalalǵa baǵa beretin komissiia músheleriniń oǵan bul úide turýǵa bolady dep aitqandaryna ashýly eken.
Al "Aqtóbe Taims" basylymynyń málimetinshe, Aqtóbedegi "Gosvetset" aýmaǵyn sý basqany sonshalyq - turǵyndar zattaryn laqtyryp, úiden júgirip shyqqan. "Bizdiń úilerge sý jaqyndap kele jatyr degende biz barlyq baǵaly zattarymyzdy jinap, shkafqa salyp qoidyq. Shkaf sý astynda qalady dep oilaǵan da joqpyz. Sodan balalardy alyp shyqtyq. Qujattarymyzdy da aldyq. Bizdiń úilerdi jyl saiyn sý basady, biraq mundai jaǵdai alǵash ret bolyp tur. Úide endi teledidar, tońazytqysh, divan, tigin mashinasy, barlyq qysqy kiimimiz...", - dedi Qundyz Baiturlieva. Aitýynsha, olardyń úii samannan salynǵan.
"14 sáýirde sý bizdiń úige jaqyndap qaldy. Ózimizben birge eshteńe de almadyq. Búkil turmystyq tehnika úide júzip júr. Sol kezde qutqarýshylarda tek bir qaiyq boldy. Evakýatsiia kezinde turǵyndar ózimen birge zattaryn alyp shyqpaq boldy, biraq qutqarýshylar oǵan múmkindik bermedi. Sebebi qaiyqta onsyz da bos oryn bolmady", - dedi Anar Ábildaeva.
"On jyl buryn úiimiz sýdyń astynda qalyp, qiraǵan bolatyn. Ol kezde kúieýimniń densaýlyǵy da jaqsy edi. Ózi qaityp úi saldy. Al qazir qaitadan sý astynda qaldyq. Eki balammen ázirshe mektepte bola turamyz, basqa qaida baramyz. Kúieýim osy jaǵdai týraly estigende qysymy kóterilip ketti. Burynǵy úiimizge qaityp barǵymyz kelmeidi", - dedi Jansulý Sadirova.
Bei-jai qaramaǵan aqtóbelikter zardap shekkenderge azyq-túlik pen kiimder ákelip jatyr.
Anar Ábildaevanyń sý astynda qalǵan úii.
Sý tasqyny kezinde Talenqulovtar otbasy shkafty alyp shyǵýǵa úlgergen.
