Biz tamaq óniminiń baǵalaryn kóterýge, alyp satarlyqqa jol bermeý úshin barlyq kúsh jigerimizdi salamyz jáne ol úshin tiisti quqyqtarmen quraldar jetkilikti. Bul týraly QR saýda jáne integratsiia ministri Baqyt Sultanov Ortalyq kommýnikatsiia qyzmetiniń onlain-brifinginde aitty, – dep habarlaidy Baq.kz.
Onyń aitýynsha, tótenshe jaǵdai kezinde Úkimet azyq-túlikpen qamtamasyz etý boiynsha barlyq sharalardy qabyldaýda. Áleýmettik mańyzy bar taýarlardyń barlyǵy turaqtandyrylǵan.
Tótenshe jaǵdai rejiminde el bolyp, ortaq qaýip-qaterge qarsy birigýige tiispiz. Qazirgi ýaqytta biz áleýmettik mańyzy bar taýarlar men azyq-túliktiń shekti baǵasyn engizý tetigin jeńildetip jatyrmyz. Bul ákimdikterge baǵalardyń aýytqýlaryna jedel den qoiýyna múmkindik beredi. Jergilikti atqarýshy organdar shekti baǵalardy kóteretin kásipkerlerge aiyppul salatyn quqyqtary bar, - dedi ol.
Sonymen qatar, ol azamattardyń ómiri men densaýylǵyn qorǵaý maqsatynda saýda nysandaryna, qyzmetterine ýaqytsha shekteýler engizilgenin atap ótti.
Saýda oryndarynda adamdardyń kóptep jinalýyna shekteýler qoiyldy. Iaǵni halyqty azyq-túlikpen qamtamasyz etý sharalarymen qatar qaýipti virýsty taratpaý sharasy da qolǵa alynyp otyr. Iri gipermarketter, bazarlar men basqa da saýda oryndary jumys isteidi, alaida birqatar erejelerdi saqtaýlary kerek. Búgin QR Densaýlyq saqtaý ministrimen birge bul nysandardy zalalsyzdandyrý boiynsha jiyn ótkizdik. Basty másele dúkenderde kezektiń oryn alýyn boldyrmaý, - dedi ministr.
Ministr, sondai-aq iri saýda oryndaryna halyq betperdemen kirgiziletinin, eger bolmasa sol jerde berileinin jetkizdi.
Iri saýda oryndary saǵat 10.00-den 18.00-ge deiin jumys isteidi. Al, azyq-túlik satpaityn bazarlar saǵat 11.00-den 17.00-ge deiin jumys isteidi. Bul saýda oryndarynyń barlyǵynda sanitarlyq norma saqtalýy kerek, - dedi ol.
