10 qazanda Qytai azamattary Murager Álimuly men Qaster Musaqanǵa qatysty QR Qylmystyq kodekstiń 392-baby 1-bóliginde qarastyrylǵan «Qazaqstan Respýblikasynyń Memlekettik shekarasyn qasaqana zańsyz ótý» boiynsha sotqa deiingi tekserý bastaldy, dep habarlaidy QR UQK ShQ baspasóz qyzmeti.
«Olar 14 qazanda Almaty qalasyndaǵy Shekara qyzmetiniń «Shyǵys» óńirlik basqarmasyna shekaradan ótý jaǵdaiyn anyqtaý úshin shaqyrtylǵan bolatyn. Protsestik tártippen ustalmady, qamaý sharalary qoldanylǵan joq. M. Álimuly men Q. Musaqan «Shyǵys» ÓB ǵimaratynda óz erikterimen qaldy jáne olarǵa tamaq, jatatyn oryn berildi», delingen habarlamada.
Vedmostvonyń málimetinshe, olar 1 qazanda QHR-dan QR-ǵa shekaradan zańsyz ótkenderi týraly aldyn ala aitqan.
«Osyǵan bailanysty, shekaradan ótý jaǵdaiyn anyqtaý, sondai-aq boljamdy quqyq buzǵan jerde protsestik jáne basqa da tekserý is-áreketterin ótkizý úshin 15 qazanda olardy Shyǵys Qazaqstan oblysynyń Zaisan qalasyna jetkizý josparlanyp otyr. Sonymen qatar, Q. Musaqan 2006 jylǵy 21 maýsymda mal urlyǵy úshin qylmystyq jaýapkershilikten jaltarý maqsatynda Qazaqstan-Qytai shekarasyn buzǵandyǵy belgili boldy. Ol kezde tekserý jumystarynan keiin QHR-ǵa qaitarylǵan bolatyn», delingen habarlamada.
Shekara qyzmeti oqiǵanyń qoldanystaǵy zańnamalaryna sáikes júrgizilip jatqanyn jetkizdi.
«UQK Shekara qyzmeti QHR azamattary M. Álimuly men Q. Musaqanǵa qatysty sotqa deiingi tekserý, olardyń quqyqtarynyń tolyq saqtalýymen, sondai-aq halyqaralyq mindettemelerge jáne Qazaqstan Respýblikasynyń qoldanystaǵy zańnamalaryna sáikes júrgizilip jatqanyn habarlaidy», delingen habarlamada.
