Atamekenine oralyp, Qytaidan Qazaqstanǵa kóship kelmek bolǵanda shekaralyq tekserý kezinde 50 myń dollarǵa jýyq bar jiǵan-tergen aqshasynan aiyrylyp qalǵan qandasymyz Gúljan Máýithanqyzyna qatysty apelliatsiialyq sot otyrysy búgin aiaqtaldy, dep habarlaidy baq.kz tilshisi sot zalynan.
Eki kúnge sozylǵan apelliatsiialyq sot otyrysy barysynda shekarada bar jiǵan-tergen aqshasynan aiyrylyp qalǵan qytailyq qandasymyz Gúljan Máýitqanqyzynyń isi búge-shigesine deiin qaralyp, tergeý barysynda birqatar óreskel zań buzýshylyqtardyń oryn alǵany anyqtaldy.
Kesheli-beri osy iske qatysy bar jábirlenýshilerden, kýágerlerden, advokat pen aiyptaýshy taraptyń jaýabyn tyńdaǵan Shyǵys Qazaqstan oblystyq qylmystyq isterdi qaraityn sot alqasy Gúljan Máýitqanqyzynyń isine qatysty tómendegidei sheshim shyǵardy.
«Búgingi sot 2017 jylǵy 10 sáýir kúngi Zaisan qalalyq sotynyń shyǵarǵan úkiminiń kúshin joiyp, bul isti sottan prokýratýraǵa tergeýge joldaý týraly sheshim shyǵardy», - deidi sot zalynan shyqqan tilshimiz.
Esterińizde bolsa, buǵan deiin Shyǵys Qazaqstan oblysy Zaisan aýdandyq soty jalǵyzbasty áieldi QR Qylmystyq kodeksiniń 234-baby (ekonomikalyq kontrabanda) boiynsha aiypty dep tanyp, ústinen 68 myń teńge aiyppul saldy.
Al, 9900 dollaryn ǵana qaitaryp berip, qalǵan 40 myń dollar qarjysyn memleketke kiris retinde bekitken bolatyn.
Búgingi sot otyrysynan aita ketetin taǵy bir jaǵymdy jańalyq, Ádilbek Muqtashuly men Gúljan Máýitqanqyzynyń ústinen qozǵalǵan tergeý kezinde jáne sot kezinde ártúrli jaýap bergeni úshin ekeýi jaýapqa tartylady degen qaýlynyń da kúshi joiylǵan.
