Parlament Senaty memlekettik shekara mańynda ornalasqan aýyl sharýashylyǵy maqsatyndaǵy jerlerdi sheteldikterge berýge tyiym salatyn zańdy qabyldady, dep habarlaidy Sputnik Qazaqstan.
Búgin Senatta "Qazaqstan Respýblikasynyń keibir zańnamalyq aktilerine agroónerkásiptik keshendi retteý máseleleri boiynsha ózgerister men tolyqtyrýlar engizý týraly" zań jobasy ekinshi oqylymda qaraldy. Zań jobasy 13 kodeks pen 29 zańǵa ózgerister men tolyqtyrýlar engizýdi kózdeidi.
"Zań jobasynda memlekettik shekara mańynda ornalasqan aýyl sharýashylyǵy maqsatyndaǵy jerlerdi sheteldikterge, azamattyǵy joq adamdarǵa, sheteldik zańdy tulǵalarǵa, sondai-aq sheteldikterdiń qatysýy bar qazaqstandyq zańdy tulǵalarǵa berýge tyiym salý kózdelgen", - delingen senattyń agrarlyq máseleler, tabiǵatty paidalaný jáne aýyldyq aýmaqtardy damytý komitetiniń qorytyndysynda.
Budan bólek, zań jobasynyń negizgi túzetýleri jer resýrstary salasyndaǵy mynadai normalardy kózdeidi: erekshe qorǵalatyn tabiǵi aýmaqtardyń jerlerin bosalqy jerlerge aýystyrý jaǵdailaryn shekteý; aýyl sharýashylyǵy maqsatyndaǵy jerlerdiń utymdy paidalanylýyna baqylaý jasaý tetigin jetildirý; aýyz sý sapasyndaǵy jerasty sýlaryn paidalanýǵa ruqsat berý talaptaryn naqtylaý.
Sondai-aq, janýarlar men ósimdikter álemi salasyndaǵy brakonerlik máseleleri boiynsha ákimshilik jáne qylmystyq zańnamalardyń normalary qatańdatyldy.
Zań jobasynda kózdelip otyrǵan ózgerister zańnamalyq bazany jetildire otyryp, eńbek ónimdiligin eseleýge, sondai-aq óńdelgen ónim eksportyn ulǵaitý arqyly agroónerkásip kesheni salasynyń básekege qabilettiligin arttyrýǵa qolaily múmkindikter qalyptastyrmaq.
Senat depýtattary zań jobasyn ekinshi oqylymda maquldap, qabyldady.
