sýret ashyq derekkózden alyndy
Ózbekstan prezidenti Shavkat Miziiaev "áldekimder usynys jasasa da, BAQ-tardy jappaitynyn" málimdedi. Ol muny Qashqadariia oblysynda jańa mektepti ashý saltanaty kezinde aitqanyn jergilikti BAQ prezident baspasóz hatshysy Sherzod Asadovqa siltep habarlady, dep jazady Azattyq.
"Buqaralyq aqparat quraldaryna qoldaý kórsetpeitin jabyq el bolǵandyqtan, halyqtyń ádiletti talabyn estimedik. Erkindik unai ma sizderge? Maǵan unaidy. Iá, maǵan qiyndaý bolady. Maǵan "keibir BAQ-tardy jaýyp tastaý kerek" deidi. Biraq men jappaimyn" dedi ol.
Mirziiav "BAQ-pen dos bolý kerek" deidi.
"Aita bersin, biraq ádilin aitsyn. Synasa da, ádil synasyn. Eger sodan aýylǵa, mektepke, bilim salasyna paida bolsa, tipti jaqsy. Men kúnde oqyp otyramyn, internetti de qarap júrmin. Múmkindiginshe kúnine eki saǵat ýaqytymdy bólip, qaryndashpen astyn syzyp oqimyn. 10 pikirdiń toǵyzy durys. Bul baǵytymyz durys pa? Durys" dedi ol.
2021 jyly aqpanda Shavkat Mirziiaev jýrnalistermen sóileskende "qoryqpańdar, senderdiń arttaryńda prezident tur" degen edi.
Prezident BAQ jumysyna tsenzýra jasaǵan, kedergi keltirgen sheneýnikti jazalaýdy usyndy. Mundai ákimshilik jazany 2019 jyly da usynǵan, biraq zań normasyna ainalmastan qalǵan. Burynǵy depýtat Rasýl Kósherbaev "oǵan kúsh qurylymdary kedergi jasady" degen edi.
2021 jylǵy aqpanda Ózbekstan Qylmystyq kodeksine jýrnalistiń zańdy jumysyna kedergi keltirý, iaǵni qyzmet babyn paidalaný arqyly jýrnalist pen onyń týystaryna qysym jasaý, kúsh qoldanýdy aiyptaityn norma engizý usynylǵan. Biraq ol da qabyldanbastan qalǵan.
Úkimettik emes uiymdardyń baiandamalaryna qaraǵanda, Ózbekstan sóz erkindigi nashar elder sanatyna jatady. Halyqaralyq "Shekarasyz tilshiler" uiymynyń jyl saiynǵy qorytyndysyna qaraǵanda, 2022 jyly Ózbekstan sóz erkindigi boiynsha dúniejúzindegi 180 eldiń ishinde 133-orynǵa toqtaǵan.
