Otbasy degen shaǵyn memlekette ákeniń qairaty men aibaty, ananyń meiirimi men mahabbaty qatar tógilip, eki sezim egiz burymdai órilgende ǵana irgesinen izgilik shýaǵy shashyramaq. Bundaida qazaq «Erkek – úidiń egesi, áiel – úidiń shegesi» dep jatady.
Otaǵasy Serik Tóleýbaev Pavlodar oblysy, Ekibastuz qalasyndaǵy «Bogatyr» kómir kenishinde jol jóndeýshi bolyp jumys isteidi. Al otanasy Nursulý Erkebaiqyzy mádeniet salasynyń qyzmetkeri. Otbasynda bir qyz, eki ul ómirge kelip, olardan 7 nemere súiip otyr. Serik Aitqululy ujymda bedeldi. Kóp jyldan beri eńbegin adal atqarǵany úshin III dárejeli «Eńbek dańqy» ordenimen marapattalǵan. Bos ýaqytynda nemerelerin aýylǵa aparyp, tórt túlik malmen, aýyl ómirimen tanystyrady. Otaǵasy úshin otbasynyń árbir múshesiniń jeti atasyn bilgeni óte mańyzdy. «Jeti atasyn bilgen ul jeti jurttyń qamyn jer» degen ataly sózdi arqaý etip, nemerelerine ata tarihy týraly aityp, olardyń qandai jan bolǵanyn, eli-jurty úshin etken erligi, ónegeli isteri jaiynda áńgimelep otyrady. Osylaisha, bala ata dástúrin jalǵastyrsa eken deidi. Al jary Nursulý Erkebaiqyzy joǵary bilimdi, Ekibastuz qalasy ákimdigi Mádeniet jáne tilderdi damytý bóliminiń «Atamura» mádeniet ortalyǵynda 20 jyldan beri qyzmet istep keledi. Ekibastuz qalasy ákiminiń janyndaǵy memlekettik til saiasatyn odan ári jetildirý jónindegi jumys tobynyń belsendi múshesi. 2018 jyldan qala ákimi janyndaǵy qoǵamdyq keńestiń múshesi, Ekibastuzdaǵy isker áielder assotsiatsiiasynyń múshesi.
«Shúkir, balalarymyzdyń barlyǵy ómirden óz oryndaryn taýyp úlgerdi, ulymyzdy uiaǵa, qyzymyzdy qiiaǵa qondyrdyq. Búginde olardan nemere súiip otyrmyz. Úlken ulym áke jolyn qýyp kenshi boldy. Al kenje ulymyz bolsa, mádeniet salasyna moiyn burdy. Búginde Qorǵanys ministrligi ortalyq áskeri orkestriniń solisi. Kelinderim de shyǵarmashylyqqa jaqyn jandar. Qai ata-ana bolmasyn balasyna túzý tárbie berýge tyrysady ǵoi. Biz de solai, balalarymyzǵa úlkenge izet, kishige qurmet kórsetýdi, adal bolýdy, adam bolýdy úirettik. Ata-ana jaqsy isimen de úlgi bolýy kerek. Kelinderimiz bizdiń otaǵasy ekeýmizdiń aramyzdaǵy qarym-qatynasqa tańǵalyp, qyzyǵyp jatady. Bizdiń shańyraq kótergenimizge 34 jyl bolsa da, bir-birimizge únemi qamqorlyq tanytyp, balalarymyzǵa úlgi bolýǵa tyrysamyz. Balalaryma únemi aityp otyramyn: «Meni otbasynyń kiesine ainaldyrǵan ákeleriń», dep. Otbasynda ákeniń rólin kóterý arqyly balany durys tárbielei alasyń», deidi N.Erkebaiqyzy.
Aitpaqshy, Tóleýbaevtar otbasy ótken jyly «Mereili otbasy» ulttyq baiqaýynyń respýblikalyq kezeńine joldama alyp, Qazaqstan Respýblikasy Tuńǵysh Prezidenti – Elbasy Qorynyń arnaiy syilyǵynyń iegeri atanǵan.
«Otanasy Nursulý Erkebaiqyzy otbasynyń ǵana emes, qalamyzdyń mádeni, qoǵamdyq sharalaryna belsene qatysady. Al Qazaqstan Respýblikasy Qarýly Kúshteri Ulttyq áskeri-patriottyq ortalyǵy Ortalyq ansambliniń kontsertmeister uldary Dáýren jaqynda Qazaqstan Respýblikasy Prezidentiniń 2020 jylǵy 30 sáýirdegi Jarlyǵymen «Eren eńbegi úshin» medalimen marapattaldy. Bul da zor qýanysh boldy», deidi Pavlodar oblysy, Ekibastuz qalasy Mádeniet jáne tilderdi damytý bóliminiń basshysy Aijan Hamzaqyzy.
Raýan Qaidarov,
"Egemen Qazaqstan" gazeti
