Búginde ánshi Erkin Nurjanov oryndap júrgen ánniń sózin aqiyq aqyn Muqaǵali Maqataevtyń jetpisinshi jyldardyń ortasynda jazǵany belgili. Al óleńniń kimge arnalǵanyn jáne shyǵý tarihyn Kúlsinbúbi Qybyraeva aityp berdi.
1974 jyly jaz aiy bolatyn. Ol kezde men 24 jastamyn. Joldasym jáne Qazaq radiosynyń diktory Baqytjan Atageldiev úsheýimiz kóshede kele jatqanbyz. Jolda Muqaǵali atamyzben qarama-qarsy jolyǵyp qaldyq. Ol kisiniń bir qasieti bizdiń jaqtyń adamdaryn birden tanityn. Olar amandasyp, jaqyn jerde foie bar eken, sonda baryp otyrdy. Men er adamdarǵa aralaspaiyn dep bir taldyń kóleńkesinde turdym. Bul kisi bir-eki ret artyna qarap qoiyp otyrǵan. Bir kezde maǵan qarady da «anaý meniń jerimniń qyzy, meniń elimniń topyraǵynyń iisi shyǵyp tur ǵoi, neǵyp tur ana jerde, shaqyryńdar», dedi. Sodan qastaryna kelip otyrdym. Ol kisi qarap otyryp bir-eki suraq qoidy.
- Qai oqýdy bitirdiń, dedi.
- Shet tilder institýtyn bitirdim, dedim,
- O-o, Shet tilder institýtyn bitirseń nege shashyńdy qimadyń, nege boianbadyń, dedi. Ol kezde qalada qansha jyl oqysam da shashymdy qimai qos burym etip órip qoiatynmyn. Sodan qarap otyrdy da, bir kezde ózine qarai tartyp, mańdaiymnan súiip, shashymnan sipady da osy óleńdi oqydy.
Iek artqan teńizge múiisteiin,
Kelshi, qarǵam, shashyńnan iiskeiin?
Iiskeiin tek qana, tiispeiin,
Kelshi, qarǵam, shashyńnan iiskeiin?
Qolań qara shashyń-ai kún qaqtaǵan!
Qos burym-ai jotanda bulǵaqtaǵan!
Qarǵam, sende jerimniń iisi bar-aý,
Jer iisi jupardan qymbat maǵan!
Iisi bar-aý dánniń de, shalǵynnyń da,
Qyrdyń da, qyrmannyń da, jańbyrdyń da,
Tur, sirá, myna shashta iisi ańqyp
Aptaptyń, ańyzaqtyń, tandyrdyń da.
Shashyńnan iisketshi, qarǵam, maǵan?
Esime túser me eken arman-dalam.
Iisketshi?
Jaýqazyn-jan ekensiń;
Jasandy ásemdikke aldanbaǵan.
Turǵam joq saýǵa suraý qylyǵyńnan,
Jan edim mahabbattyń quryǵy urǵan.
Iiskeiin jurtymnyń topyraǵyn,
Iisket, qarǵam, maǵan burymyńnan?
Tórt shýmaq. Oqyp bitip «osy óleńdi men saǵan arnadym, qalqam», dedi.
Bir-eki aidan soń «Leninshil jas» gazeti bolsa kerek sol kisiniń óleńder jinaǵy jaryq kórdi. Joldasym alyp júgirip kelipti. «Mynaǵan qara, saǵan arnaǵan óleń shyǵypty»,-dedi. Rasynda da sol gazetke jarialanǵan óleńderdiń ishinde júr eken.
Óleńdi alǵash ret án retinde Ramazan Stamǵaziev dombyramen oryndady. Keiin Erkin Nurjanov estradaǵa alyp keldi. Al ánge arqaý bolǵan Kúlsinbúbi Qybyraeva qazir Almaty qalasynda turady. Balaly-shaǵaly. San jyldar Ál-Farabi atyndaǵy daryndy balalarǵa arnalǵan gimnaziiada mamandyǵy boiynsha ustazdyq etken. Búginde qurmetti zeinetke shyqqan.
