Agroónerkásip keshenindegi saqtandyrý salasynyń operatory – Aýyl sharýashylyǵyn qarjylai qoldaý qory iri qara maldy saqtandyrý ónimderin bekitti, dep habarlaidy "Ult aqparat".
Aita keterligi, búginge deiin agroónerkásip kesheninde maldy maqsatty túrde saqtandyrý bolmaǵan. Iesi malyn tek múlik retinde saqtandyra alatyn. Eger, joǵalsa nemese kólik qaǵyp ketken jaǵdaida ǵana saqtandyrý tólenetin. Endi aýrýdan jáne basqa da qaýip-qaterlderden saqtandyra alady.
«Qazirgi epizootiialyq jaǵdai eskerilip, sheteldik qaita saqtandyrýshylarmen birge túrli táýekelderdi saqtandyrý ónimderi ázirlendi. Osy ónimder arqyly fermerler maldy óz sharýashylyǵynyń aýmaǵynda jáne 5 km radiýstaǵy kórshi sharýashylyqtardyń aýmaǵyndaǵy aýrýlar men basqa da táýekelderden saqtandyra alady. Táýekelder qataryna infektsiialyq jáne asa qaýipti aýrýlar, órt, úshinshi tulǵalardyń ziiandy áreketteri, qaýipti tabiǵi qubylystar, sondai-aq jazataiym oqiǵalar – jarylys, naizaǵai túsý, tunshyǵyp ólý, jyrtqysh ańdardyń shabýyly, jylan nemese jándikterdiń shaǵýy, túrli sebeptermen jaraqattanýy jáne taǵy basqalar kiredi», - delingen baspasóz baianynda.
Al «Aýyl sharýashylyǵyn qarjylai qoldaý qory» AQ basqarma múshesi – basqarýshy direktory Asqar Qalievtyń aitýynsha, qazir elimizde etti jáne sútti baǵyttaǵy mal sharýashylyǵyn damytý baǵdarlamalary júzege asyrylyp keledi.
«Myńdaǵan sharýa qojalyqtary etti baǵyttaǵy asyl tuqymdy iri qara mal satyp alý úshin jeńildetilgen nesiemen qarjylandyrylýda. Mundai jaǵdaida nesie berýshi uiymdardyń taban tireitin qaýipsizdik tetigi bolýy mańyzdy. Biz jańa saqtandyrý ónimderin engizý fermerlerge táýekelderden qorǵanýǵa, jobalardy qarjylandyratyn kompaniialarǵa salǵan qarajattaryn qorǵaýǵa múmkindik beredi dep sanaimyz», - deidi ol.
Iri qara malǵa qatysty táýekelder álemdik naryqtaǵy «A» reitingi bar Halyqaralyq qaita saqtandyrý kompaniialarynda saqtandyrylady. Bul saqtandyrý jaǵdaiy týyndaǵan kezde fermerlerge kepildendirilgen tólemderdi qamtamasyz etýge múmkindik beredi.
Shart jasasý protsesi, odan ári fermer men saqtandyrý kompaniiasynyń jáne operatordyń jumysy WWW.QOLDAU.KZ elektrondyq platformasynda júrgiziledi.
