Reseilik oppozitsioner Aleksei Navalnyidy emdep jatqan germaniialyq "Sharite" klinikasy Býndesver zerthanasynyń jáne Britaniia áskeriniń ý boiynsha mamandarynan kómek surady. Bul týraly Der Spiegel jýrnalynyń derekkózderi habarlady.
Jýrnaldyń málimetinshe, klinika Miýnhendegi ý jáne áskeri himiialyq zattar jóninde Germaniianyń úzdik mamandary jumys isteitin jabyq áskeri zerthanaǵa ótinish bildirgen. Sonymen qatar klinika britaniialyq "Porton-Daýn" áskeri zerthanasynan da keńes suraǵan. Bul zerthana Resei barlaý qyzmetiniń burynǵy ofitseri Sergei Skripal men onyń qyzyna diagnoz qoiýmen ainalysqan.
Navalnyi 20 tamyzdan beri komada jatyr. Juma, 28 tamyz kúni klinika saiasatkerdiń densaýlyǵy jóninde esebin jariialady. Aqparatqa sáikes, ol áli de ókpeni jasandy jeldetý apparatymen tynys alyp jatyr, biraq jaǵdaiy turaqty. "Ýlanýdyń uzaqmerzimdi saldary týraly aitýǵa áli tym erte" delingen málimdemede.
Navalnyi 20 tamyz kúni Omby qalasynyń aýrýhanasyna essiz kúide túsken. Dárigerler ony jasandy komaǵa jibergen. Reseilik dárigerler saiasatkerdiń mundai halge ne sebepti túskenin anyqtai almaǵan, al nemis dárigerleri onyń ýlanǵan bolýy múmkin ekenin aitady. Olardyń sózinshe, saiasatker holinesteraz ingibitorymen ýlanǵan bolýy yqtimal. Himiialyq zattardyń bul sanatyna "Novichok" jáne zarin sekildi ýlaǵysh zattar, pestitsidter men keibir dáriler kiredi.
Oppozitsionerdiń jaqtastary onyń ýlanǵanyna senimdi. Batys saiasatkerleri tergeý júrgizýdi talap etedi. Resei tarapy áli qylmystyq is qozǵamady – bilik ókilderi oppozitsionerdi ýlady degen zattyń anyqtalýyn kútý kerek deidi.
