Túrkistan oblysynyń aýyr atletika federatsiiasynyń prezidenti, Shardara aýdanynyń ákimi Qairat Joldybai aýyr atletika sportynan 2022 jyly el chempionattarynda top jarǵan 8 sportshyny jáne jattyqtyrýshylaryn marapattady, dep habarlaidy «Ult aqparat» oblys ákimdiginiń baspasóz qyzmetine silteme jasap.
Chempiondarǵa arnaiy alǵys hattar men baǵaly syilyqtar tabystady. Sondai-aq aýyr atletterge olimpiadalyq standartqa sai «Eleiko» ziltemirin syiǵa tartty.
«Búgingi tańda aýdanymyzda barlyq sport túrleri qaryshtap damyp keledi. Shardarany álem qol kúres arqyly tanidy. Al sizder dańǵyl jolǵa qadam basyp, el ishindegi chempionattarda jeńip otyrsyzdar. Bul óte joǵary kórsetkish dep bilemin. Ózderińizdei sportshylar men jattyqtyrýshylardyń qajyrly eńbeginiń arqasynda aýdanymyzdyń mereii ústem bolýda. Sizderge ózimniń shynaiy alǵysymdy bildiremin jáne sizdermen maqtanamyn. Aýyr atletika sportynan álemdi baǵyndyryp, Shardarany shartarapqa tanyta beredi dep senemin!», – dedi Q.Joldybai.
Biyl aýyr atletika sportynan Dáýlet Amangeldi, Turǵanbai Álisher, Arapbai Nurasyl, Arapbai Janasyl, Irsali Nurmuhammed, Qoibaǵar Nurdaýlet, Bahter Nurjan jáne Asylbekova Uljan top jarǵan bolatyn. Sonymen birge osy órenderdi daiarlaǵan bapkerler – Ashat Kýbeev pen Talǵat Óskenbaevqa qurmet kórsetildi.
