Prezident jalaqyny kóterýge moratorii engizgennen keiin ministrler men depýtattardan eshqandai shaǵym túspegen. Bul týraly Eńbek jáne halyqty áleýmettik qorǵaý ministri Serik Shápkenov aitty, dep habarlaidy Sputnik Qazaqstan.
11 qańtarda Memleket basshysy Qasym-Jomart Toqaev úkimet músheleri, depýtattar men ákimderdiń ailyǵyn kóterýge moratorii engizdi.
"Meniń oiymsha, joǵaryda atalǵan memlekettik qyzmetshiler sanatynyń jalaqysy ábden jetkilikti. Sondyqtan úkimet músheleri, óńir ákimderi men depýtattardyń jalaqysyn kóterýge bes jyldyq moratorii jariialaý múmkin dep sanaimyn", - dedi Toqaev.
Serik Shápkenovtiń aitýynsha, osy sheshimnen keiin sheneýnikter tarapynan eshqandai shaǵym túspegen.
"Shaǵym bolǵan joq. Men Prezidentti tolyǵymen qoldaimyn. Qazirgi tańda ministrlerdiń jalaqysy, meniń oiymsha, jetkilikti", - dedi ol.
Jýrnalister ministrden moratoriiden keiin sheneýnikterdiń qyzmetten ketý úrdisi baiqalmai ma dep surady. Eńbek ministrliginiń basshysy áriptesteri úshin jaýap bere almaitynyn jáne árbir sheneýnik ózi sheshetinin atap ótti. Biraq Shápkenov óz tabysynyń jetkilikti ekenin aitty.
"Ministrler de adam ǵoi, infliatsiia da olarǵa áser etedi. Olarǵa bólek arzan azyq-túlik joq. Sol sebepti, árine, áser etedi. Biraq, meniń oiymsha, búgingi tańda meniń jalaqym aqylǵa qonymdy. Sol sebepti ol jetkilikti", - dep naqtylady ministr.
Aita keteri, qazaqstandyq ministrlerdiń ailyǵy 900 myń teńgeden bastalady. Oblys ákimderi 1,8 million teńge tabady. Parlament depýtattarynyń jalaqysy 600 myńnan 1,5 million teńgege deiin barady. Al Qazaqstanda ortasha jalaqy mólsheri 2022 jylǵy aqpan aiynyń basynda 275 580 teńgeni qurady.
Buǵan deiin Shápkenov jumys berýshilerden qazirgi infliatsiiany eskerip, qaramaǵyndaǵy qyzmetkerleriniń jalaqysyn kóterýdi suraǵan bolatyn.
