«Shańyraq» baǵdarlamasy aiasynda qaitalama naryqtan turǵyn úi satyp alýǵa ruqsat berý páter baǵasynyń ósýine túrtki bolýy múmkin. Bul jaiynda Májilis depýtattarynyń saýalyna QR Premer-Ministriniń jaýabynda aitylǵan, dep habarlaidy "Ult aqparat".
«Ulttyq bankpen áleýmettik turǵyn úi salý jáne «Shańyraq» baǵdarlamasynyń sharttary boiynsha kezekte turǵan adamdarǵa «Otbasy bank» AQ arqyly kredit berý úshin 390 mlrd teńge bólindi. Jańa qurylystarda turǵyn úi satyp alý quqyǵymen jobany iske asyrý qurylys kompaniialarynyń kásipkerlik belsendiligin arttyrýǵa, ekonomikanyń ósýin jáne halyqtyń jumyspen qamtylýyn qamtamasyz etýge múmkindik berdi», - dedi Asqar Mamin.
Úkimet basshysynyń dereginshe, 2020 jyldyń qorytyndysy boiynsha qurylys ekonomika salalary arasynda jetekshi orynǵa ie boldy. Respýblika boiynsha qurylys jumystarynyń kólemi 4,9 trln teńgege jetti. Bul 2019 jyldan 11,2 paiyzǵa artyq. Barlyǵy 15,3 mln sharshy metr jańa turǵyn úi (140 myń turǵyn úi) salyndy nemese ótken jyldyń deńgeiinen 16,8 paiyzǵa artty.
«2021 jyly búkil el boiynsha turǵyn úidi paidalanýǵa berý jospary 17 mln sharshy metr turǵyn úidi quraidy. Turǵyn úi qurylysyna investitsiialar 2019 jylmen salystyrǵanda 33,6 paiyzǵa ósip, shamamen 2 trln teńge boldy. Memlekettik qarajattyń 1 teńgesine 5 teńge jeke investitsiialar tartylýda. Qabyldanǵan sharalar otandyq óndiris ónimderine suranysty qamtamasyz ete otyryp, qurylys indýstriiasyn damytýǵa mýltiplikativtik áser etti. Osylaisha, otandyq kásiporyndar shamamen 667 mlrd teńge somasyna qurylys materialdaryn óndirdi»,- dedi Premer-Ministr.
Osyǵan bailanysty ol Turǵyn úi-kommýnaldyq damýdyń 2020-2025 jyldarǵa arnalǵan «Nurly jer» memlekettik baǵdarlamasynyń (onyń ishinde «Shańyraq» kishi baǵdarlamasynyń) mańyzdy mindetteriniń biri turǵyn úi qurylysyn damytýdy qoldaý bolyp sanalatyndyǵyn basa aitady.
«Qaitalama naryqta «Shańyraq» baǵdarlamasy aiasynda turǵyn úi satyp alý múmkindigin berý osy sektordaǵy turǵyn úi baǵasynyń ósýine túrtki bolýy múmkin. Joǵaryda baiandalǵandy eskere otyryp, aǵymdaǵy jaǵdailarda «Shańyraq» baǵdarlamasy sheńberinde turǵyn úidi bastapqy naryqta ǵana ótkizýdi jalǵastyrǵan oryndy dep sanaimyn. Jalpy, azamattardy turǵyn úimen qamtamasyz etý máseleleri Úkimettiń turaqty baqylaýynda», - dedi Asqar Mamin.
